ზუგდიდში, საქართველოს ალიანსი, „უსაფრთხო გზებისთვის“ პროექტის ფარგლებში, ასოციაცია „ათინათის“ სამოქალაქო განათლებისა და პედაგოგთა გადამზადების პროგრამის ორგანიზებით, პარტნიორი სკოლებისა და სამოქალაქო კლუბის 55 წევრთან შეხვედრა გაიმართა. კამპანია „საჭესთან ფრთხილად“ მიზანდ ისახავს საზოგადოების ცნობიერების ამაღლებას ნასვამ მდგომარეობაში ავტომობილის მართვასთან დაკავშირებულ საკითხებზე და ნასვამობით გამოწვეული ავტოსაგზაო შემთხვევების შემცირებას. საქართველოს ალიანსი „უსაფრთხო გზებისთვის“ წარმომადგენელმა მაია ქობალიამ, ყოველწლიურად მსოფლიო გზებზე მომხდარი ავტოსაგზაო შემთხვევების პრეზენტაცია გამართა. ავტოავარიაში 1,3 მილიონი ადამიანი იღუპება, 50 მილიონამდე ადამიანი კი იღებს მძიმე ტრამვას, ხოლო 15–44 წლამდე ადამიანში სიკვდილიანობის და საგზაო მოძრაობის ტრამვების მიხედვით დღესაც ერთ–ერთ პირველ ადგილზეა. ამ ავტოკატასტროფების 93% მთლიანად ან ნაწილობივ მძღოლის შეცდომის, ალკოჰოლური ინტოქსიკაციისა და სხვა ადამიანური ფაქტორების ბრალია. შეხვედრა დისკუსიის ფონზე გაიმართა. მოსწავლეები ამა თუ იმ კონკრეტულ მაგალითზე საკუთარ პოზიციას აფიქსირებდნენ და საჭესთან ნასვამ მდგომარეობაში მყოფი პირების დასჯის ახალ მექანიზმებზე საუბრობდნენ. ასევე კამპანიის, „საჭესთან ფხიზლად“ ფარგლებში ნაჩვენები იქნა სარეკლამო რგოლები. ზუგდიდის საპატრულო პოლიციის უფროსის ვახტან დადუნაძის თქმით, მსგავსი ტიპის შეხვედრები აუცილებელია მოზარდებთან. "აუდიტორიამ ნასვამობით გამოწვეულ საგზაო შემთხვევებზე და მის შედეგებზე ინფორმაცია უნდა მიიღოს, რათა შემდგომში, როგორც საკუთარს ასევე სხვის სიცოცხლეს გაუფრთხილდნენ". –აღნიშნა დადუნაძემ.