1992 და 2008  წლების საომარი მოქმედებების დროს დაზარალებული სოფელ ხურჩის მოსახლეობა ხელისუფლებისგან ზიანის სრულად ანაზღაურებას ითხოვს. წინააღმდეგ შემთხვევაში, როგორც ისინი ამბობენ, სოფელი 27 ოქტომბერს დაგეგმილ საპრეზიდენტო არჩევნებს ბოიკოტს გამოუცხადებს. ხურჩის მოსახლეობის განცხადებით, საომარი მოქმედებების დროს სოფელში  დაახლოებით 110 ოჯახი დაზარალდა. როგორც ხურჩის მკვიდრი პარმენ გელენავა ამბობს, 90-ანი წლების ომის დროს მის სახლ-კარს, ექსპერტიზის დასკვნის თანახმად, 17 ათასი ლარის ზიანი მიადგა. თუმცა გელენავას ოჯახმა, თანხის მხოლოდ ნაწილი, შვიდი ათასამდე ლარი მიიღო. „აფხაზეთის საზღვრიდან პირველი სახლი ჩემია. 90-იანი წლებიდან მოყოლებული 3-ჯერ გაიარეს რუსებმა და აფხაზებმა ეს ტერიტორია. სახლში, რომ ვბრუნდებოდით არაფერი გვხვდებოდა, ყველაფერი გატანილი იყო. სახლი დაცხრილულია, აწვიმს და ყველაფერი ლპება“, - ამბობს რადიო „ათინათთან“ საუბარში პარმენ გელენავა. სოფელ ხურჩის მოსახლეობის განმარტებით, მათ ყოფილმა ხელიუფლებამ მხოლოდ სახლებზე  მიყენებული ზიანი აუნაზღაურა, ხოლო მოძრავი ნივთებისა და სხვა ზარალის ანაზრაურებას მათი თქმით დღემდე უშედეგოდ ელოდებიან. ამასთან, ისინი აცხადებენ, რომ ზუგდიდის გამგეობამ ექსპერტიზის მიერ დადებული აქტი გაყო, რაც სახლზე მიყენებული ზიანის და სხვა ქონებრივი ზარალის ერთმანეთისგან გამიჯვნას გულისხმობდა. „მაშინ ამ საკითხს დარეჯან გაბედავა, რუსლან კილასონია და სხვები ხელმძღვანელობდნენ. ჩვენ რამდენჯერ მოვითხოვეთ ქონების ანაზღაურება, მაგრამ არცერთი ხელისუფლების დროს არ მოგვაქციეს ყურადღება. ახლი ხელისუფლება  ამბობს, რომ  სამართიანობას აღვადგენთო, იქნებ ახლა მაინც მივიოთ ის რაც გვეკუთნის სახლემწიფოსგან “, -ამბობს ნაზი თორია. ზუგდიდის მუნიციპალიტეტის გამგეობის განათლებისა და კულტურის სამსახურის უფროსი დარეჯან გაბედავა, რომელიც იმ დროს ზემოაღნიშნულ საკითხებს კურირებდა, აცხადებს, რომ ხურჩის მოსახლეობის მიმართ აღებული ვალდებულება სახელმწიფომ უკვე გაისტუმრა. „სახლმწიფოს მხოლოდ სახლზე მიყენებული ზარალის გადახდის ვალდებულება ჰქონდა აღებული.  ეს კი სახელმწიფომ 2007 წელს გაისტუმრა“, - განუცხადა რადიო „ათინათს“ დარეჯან გაბედავამ. მისივე განმარტებით, ამის შესახებ  დოკუმენტები, სხვადასხვა უწყებების მიერ,  რამდენჯერმე იქნა შესწავლილი და შესაბამისი დასკვნებიც დაიდო. სოფელ ხურჩის მოსახლეობა, ზიანის სრულად ანაზღაურების მოთხოვნით საპროტესტო აქციას , ხვალ 4 ოქტომბერს სოფლის ცენტრში გეგმავს.