დღეს, ზუგდიდში, ვასო აბაშიძის სახელობის „ახალი თეატრი“ ჩავიდა თავისი საპროტესტო მანიფესტი გამართა, აქციის ტრადიციულ ლოკაციაზე,
სახელმწიფო რწმუნებულის ადმინისტრაციის შენობის წინ, სადაც უკვე 67 დღეა, მოქალაქეები იკრიბებიან უცვლელი მოთხოვნებით: რეჟიმის პატიმრების გათავისუფლება და ხელახალი არჩევნების დანიშვნა.


ღია ცის ქვეშ დამონტაჟებული სცენიდან მოქალაქეებს თეატრის ხელმძღვანელმა დავით დოაიშვილმა მიმართა შეკრებილებს:

"მე მინდა, პირველ რიგში გავიგო თქვენი პრობლემები, გავიგო თქვენი ხმა, დავენახოთ ერთმანეთს, გავაძლიეროთ ერთმანეთი. ეს არის ჩვენთვის ყველაზე მნიშვნელოვანი. დედაჩემი სოსელიას ქალია, გალში ცხოვრობდნენ, მეც ლტოლვილი ვარ, ჩათვალეთ, ძაან უცნაურ დროში ვცხოვრობთ, ყველა რეგიონს თავისი პატიმარი ჰყავს, სამწუხაროდ“, - თქვა მან.

სცენაზე მასთან ერთად ავიდა, აქციაზე ერთ - ერთი დაკავებულის, ზუგდიდელი ლუკა ჯაბუას დედა, რომელმაც მადლობა გადაუხადა აქციის მონაწილეებს და იქ მისულებს თანადგომისთვის და დასძინა: „აუცილებლად უნდა გავიმარჯვოთ“.

ამის შემდეგ, დასის წევრებმა და მანიფესტის მონაწილე მსახიობებმა, სათითაოდ ჩამოთვალეს 50-ზე მეტი დაკავებულის სახელი და გვარი.

მათ სოლიდარობა გამოუცხადეს ყველა მათგანს, მათ შორის, თავის კოლეგას, მსახიობ ანდრო ჭიჭინაძეს და „ბათუმელები/ნეტგაზეთის“ დამფუძნებელს, მზია ამაღლობელს, რომელიც 22 - ე დღეა შიმშილობს საპატიმროში.

მანიფესტის წარმოდგენისას, მსახიობები მიმართავდნენ იქ მისულებს და უყვებოდნენ, თუ რატომ გადაწყვიტეს თეატრიდან რეგიონებში გასვლა.

მსახიობმა ნინო კასრაძემ, დედებს მიმართა და მოუწოდა მათ, რომ შვილებს დაუდგნენ გვერდში , ამ ძალიან რთულ პერიოდში:

„...ბოლოს და ბოლოს, ნოდარ წულეისკირის "სისატურა" გაიხსენეთ, მკვდარი ბავშვი როგორ გააცოცხლა, დედის ფანატიურმა სიყვარულმა, დედის სითბომ და ენერგიამ, ჩვენს ახალგაზრდებს დაუდექით გვერდში, მოუსმინეთ რა უნდათ, რა აწუხებთ. რა არის ეს თავისუფლება, რომ მისი გულისთვის კიდეც სწირავენ თავს“.


„აქ ვართ იმიტომ, რომ ის იდეა, რისთვისაც ვიბრძვით, ჩვენ ერთად, ხშირად, ცალ - ცალკე, ხშირად, სხვადასხვა ადგილებში, საბოლოო ჯამში და რასაც თავისფლება ჰქვია, არ მიიღწევა ერთად ყოფნის, ერთმანეთის დანახვის, ერთმანეთის მოსმენის და ერთმანეთის აზრის გათავალისწინების გარეშე“, - უთხრა ზუგდიდის მაყურებლებს მსახიობმა, გიორგი ბახუტაშვილმა.

„არ დავრუნდებით წარსულში“, - ასეთი იყო ახალი თეატრის დასის მანიფესტის ერთ - ერთი გზავნილი. 


ახალი თეატრის საპროტესტო მანიფესტს მხარდაჭერა გამოუცხადეს ზუგდიდის შალვა დადიანის სახელობის დრამატული თეატრის მსახიობებმა, ანდრია შამუგიამ და სალომე ბუღაძემ, სიტყვებით: „არა, ძალადობას, თავისუფლება სინდისის პატიმრებს, წინ ევროპის მომავლისკენ“.


სცენიდან შეკრებილებს ასევე მიმართეს, ზუგდიდის აქციის მონაწილეებმა და აქტივისტებმა. 

ვასო აბაშიძის სახელობის „ახალი თეატრის“ საპროტესტო მანიფესტი, თბილისის შემდეგ, რეგიონებში გავიდა. მანამდე, 1 თებერვალს, დასი მანიფესტით ბათუმში ჩავიდა.