2012 წლის საპარლამენტო არჩევნების ღამეს გარდაცვლილი ჩვილის ბარბარე რაფალიანცის ოჯახი შინაგან საქმეთა მინისტრ, ალექსანდრე ჭიკაიძესთან და კულტურის მინისტრის მოადგილე , მანანა ბერიკაშვილთან შეხვედრას ითხოვს. აღნიშნული მოთხოვნებით შინაგან საქმეთა სამინისტროში უკვე იმყოფებოდნენ რაფალიანცის მშობლები და ოჯახის წევრები. როგორც მათ განუცხადეს, მინისტრი სამინისტროში არ იმყოფება და მოგვიანებით შს მინისტრის მოადგილეს შეახვედრებენ. ამის შემდეგ რაფალიანცის ოჯახის წევრებმა კულტურის სამინისტროსთან გადაინაცვლეს, სადაც მინისტრის მოადგილე მანანა ბერიკაშვილთან შეხვედრას ითხოვენ. როგორც გარდაცვლილის მამა პავლე რაფალიანცი აცხადებს, შემთხვევა მოხდა იმიტომ, რომ "ქართული ოცნება" სკამებისთვის იბრძოდა. "ამასთან დაკავშირებით პასუხი ბერიკაშვილს არ გაუცია. ჩვენი ერთ-ერთი მთავარი შეკითხვა სწორედ ეს იქნება. გამოძიება შეფერხებულია და არ გვაქვს წარმოდგენა რატომ არ გრძელდება. ჩვენთვის ამ დროისთვის ბავშვის გარდაცვალების შესახებ არაფერია ცნობილი", - განაცხადა პავლე რაფალიანცმა. ბარბარე რაფალიანცის ოჯახის წევრები დღესვე გეგმავენ კანცელარიასთან მისვლას, სადაც ისინი პრემიერ-მინისტრ ირაკალი ღარიბაშვილთან შეხვედრას მოითხოვენ.