„არ არსებობს არავითარი ქართულ-აფხაზური რკინიგზის მონაკვეთი, რადგან ეს ტერმინი ერთობლივ საკუთრებას გულისხმობს. არსებობს აფხაზეთის რკინიგზა,რომელიც აფხაზეთის რესპუბლიკის საკუთრებას წარმოადგენს და მასზე მეზობელი საქართველოს იურისდიქცია არ ვრცელდება“- ამის შესახებ განცხადება დე ფაქტო აფხაზეთის პოლიტიკური პარტიების საკოორდინაციო საბჭომ და საზოგადოებრივმა ორგანიზაციებმა გააკეთეს. აღნიშნული განცხადება დე ფაქტო აფხაზეთის სომხური საზოგადოებრიობის მიმართვის საპასუხოდ გაკეთდა. შეგახსენებთ, მიმართვის ინიციატორები აფხაზეთის გავლით რკინიგზის აღდგენის შესაძლებლობებზე ფართომასშტაბიანი საზოგადოებრივი განხილვების დაწყების წინადადებით გამოვიდნენ. "სამხრეთ კავკასიის ტერიტორიაზე ევრაზიული ინტეგრაციული პროცესები მზარდი დინამიკით ვითარდება.მივიჩნევთ,რომ ამჟამად აფხაზეთმა შესაძლოა ხელი შეუწყოს კავკასიაში ეკონომიკური ინტეგრაციის პროცესებს და თავად გახდეს ამ პროცესების მონაწილე. ამისთვის ჩვენ მოვუწოდებთ დავუბრუნდეთ აფხაზურ-ქართული სარკინიგზო მონაკვეთის გახსნის საკითხის განხილვას,"- წერია სომეხი დეპუტატების მიერ ხელმოწერილ მიმართვაში. დე ფაქტო აფხაზეთის საკოორდინაციო საბჭო საზოგადოებრივი დისკუსიების ყველა მონაწილეს მოუწოდებს უფრო „ყურადღებით მოეკიდონ ტერმინოლოგიის საკითხს».