საქართველოს რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანია კონტრაქტორ კომპანიასთან გააფორმებს კონტრაქტს, რომელიც ქუთაისში, ფოთსა და ანაკლიაში სასმელი წყლის სისტემის გაუმჯობესებას ისახავს მიზნად. კონტრაქტზე ხელმოწერის ცერემონიალი ქუთაისში, გაერთიანებული წყალმომარაგების კომპანიის ქუთაისის ოფისში შედგება. ცერემონიალს დაესწრებიან საქართველოს რეგიონული განვითარებისა და ინფრასტრუქტურის მინისტრი დავით ნარმანია, გაერთიანებული წყალმომარაგების კომპანიის დირექტორი არჩილ ცაბუტაშვილი, ქუთაისისა და ფოთის მერები და საკრებულოს თავმჯდომარეები, ქუთაისისა და ფოთის მაჟორიტარი დეპუტატები, ზუგდიდის მუნიციპალიტეტის გამგებელი და საკრებულოს თავმჯდომარე. კონტრაქტის მთლიანი ღირებულება 59,5 მილიონი ლარია. ტენდერში გამარჯვებულია ესპანური კომპანია „Cobra Instalaciones y Servicios SA“. პროექტი აზიის განვითარების ბანკის დაფინანსებით ხორციელდება. პროექტის ფარგლებში დაგეგმილია სამი ქალაქის - ქუთაისის, ფოთისა და ანაკლიის წყალმომარაგების სისტემის გაუმჯობესება. აღნიშნული პროექტის განხორციელების შედეგად, 96 კმ-ზე გაკეთდება წყალმომარაგების მილები. 5 ადგილას აშენდება რკინა-ბეტონის წყლის რეზერვუარები საერთო სიმძლავრით 35 000 მ/კუბ. ასევე, პროექტი მოიცავს 4 სატუმბი სადგურის (საერთო სიმძლავრით 4 516მ³/სთ) მშენებლობას და წყლის გამწმენდი ნაგებობის მშენებლობას.