დაახლოებით 1 წლის წინ, ბაბუას სახელოსნოში ძველი ნივთების დათვალიერებისას, ზუგდიდელმა ლევან ბებიამ სხვადასხვა წლებით დათარიღებული ოცზე მეტი ფირი აღმოაჩინა. როგორც მოგვიანებით გაირკვა, ბაბუამისის, შაქრო როგავას ფოტოარქივი ეროვნულ-განმათავისუფლებელი მოძრაობის სამეგრელოსა და აფხაზეთში მიმდინარე მოვლენებს ასახავდა, რომელიც თვითნასწავლმა ფოტოგრაფმა მომავალ თაობებს საგულდაგულოდ შემოუნახა.

"ახალგაზრობიდან სულ აინტერესებდა ფოტოგრაფია და ზოგადად, ტექნიკა. უღებდა ყველაფერს, სვანეთში 10 დღით წასულა, უშბის გადასაღებად, მანამდე კი თბილისში იყიდა ისეთი ფოტოაპარატი, შორ მანძილზეც რომ გადაიღებდა. ზენიტი ჰქონდა, კოდაკი... თვითნასწავლი ფოტოგრაფი - ასე ვამბობ ხოლმე მასზე. ტელევიზიის თანამშრომელი იყო წლები. აქედან სიგნალი მიეწოდებოდა მთელ რეგიონს და გადიოდა გადაცემები. შაქრო კი ტექნიკური ინჟინერი იყო", - გვეუბნება შაქრო როგავას ცოლი, დალი გრიგოლაია და მეუღლის გახსენებისას ხმაში ბზარი უჩნდება.

ოჯახი სიყვარულით შექმნეს და მეუღლეს დღემდე, როგორც საუკეთესო მეგობარს და მამას მოიხსენიებს.

დალი გრიგოლაია გვიყვება, რომ 9 აპრილის მოვლენების შემდეგ მათი ცხოვრება რადიკალურად შეიცვალა, მიტინგებზე სიარული და ღამისთევა ყოველდღიურობად იქცა. მაშინ ცოლ-ქმარი სამშობლოს ოკუპაციას ერთად აპროტესტებდა და ქვეყნის დამოუკიდებლობას ითხოვდა.

"ყველგან დაყვებოდა გამსახურდიას და კოსტავას, სამეგრელოს ყველა რაიონში. ისეთი ბედნიერი იყო ეროვნული მოძრაობით, სახლი მიატოვა, გადართული იყო. თავისი მანქანით დადიოდა მიკროფონით, მეგაფონით ქუჩებში, სოფელ სოფელ, რაიონებში, რომ ხალხი გამოსულიყო მიტინგზე. რამდენჯერ დაუკავებიათ, წაურთმევიათ აპარატი... მიტინგის მერე რადიოფიცირებაც ამას მიყავდა, განათება ებარა, ტექნიკური უზრუნველყოფა ყველაფრის. ბევრი სირთულე გამოუვლია ეროვნულ მოძრაობაში, ყველაფერს ვერ ჩამოვთვლი, სულ მათთან იყო", - გვიყვება დალი გრიგოლაია.

75 წლის ქალი წუხს, რომ მაშინდელი სიტუაციისგან განსხვავებით, დღეს საზოგადოება გახლეჩილია, ახალგაზრდა თაობებმა კი საქართველოს უახლესი ისტორიის შესახებ ცოტა რამ იციან.

"სამეგრელოს ყველა რაიონში საოცარი განწყობა იყო შვილო, ყველას ერთმანეთი გვიყვარდა, ერთმანეთზე ვზრუნავდით, ვუზიარებდით გასაჭირს... ახლა არ არის ეგრე, ამაზე ძალიან ვწუხვარ. ერთ პურს რომ შემოიტანდა მიტინგზე ვინმე, ყველანი ვიყოფდით. მთელ ღამეს ვათევდით მოედანზე. ახლანდელ გუბერნიასთან ვიკრიბებოდით, ყინვაში საბურავებს ვანთებდით, მახსოვს სულ გამურულები ვიყავით. არასდროს გაგვიცდენია არც ერთი დღე", - ამბობს ის.

იხსენებს, რომ ეროვნულ-განმათავისუფლებელი მოძრაობის ამ დრომდე გაუმჟღავნებელ ფირებს, მისი ქმარი განსაკუთრებულად უფრთხილდებოდა. დათარიღებული არქივის ადგილსამყოფელს ხშირად ოჯახის წევრებსაც არ უმხელდა.

"მაშინ შაქრო სულ იღებდა ფოტოებს, ჩაწერილი ჰქონდა როდის რა გადაიღო... სიტუაცია რომ დაიძაბა და "მხედრიონი" შემოვიდა, ეს ფირები ისე გადამალა, რომ არავის მიეგნო და არ ენახა", - გვიხსნის ქალი.

ეროვნული მოძრაობის ერთგულებისთვის შაქრო როგავა მოგვიანებით სამსახურიდანაც გაუშვეს, მიზეზად "სამუშაო საათების გაფლანგვა" დასახელდა. მაშინ, შაქრო როგავა ზუგდიდში ტელევიზიის სიგნალის მიმღები ანძის ტექნიკური ინჟინერი იყო.

ფოტოგრაფის მეუღლე მიიჩნევს, რომ განსაკუთრებით მძიმე და საბედისწერო შაქრო როგავასთვის ზვიად გამსახურდიას გარდაცვალების ფაქტი გახდა.

"ძალიან იმოქმედა ზვიად გამსახურდიას სიკვდილმა, სულ ნერვიულობდა. მე არ ვამტკიცებ არაფერს, მაგრამ ძალიან ედარდებოდა. ამ ნერვიულობის ფონზე კაცი, რომელიც არასდროს არ ყოფილა ავად და ცუდად, გულის შეტევით გარდაიცვალა. ისე განიცდიდა, მეგობრები მოდიოდნენ და ატყუებდნენ, ზვიადი იქ იყო, აქ ნახეს, მაგრამ ეგ არ სჯეროდა, იცოდა რომ ცოცხალი აღარ იყო. საათობით იჯდა და ფიქრობდა ზვიადის გარდაცვალებაზე... მხოლოდ 2 წლით მეტი იცხოვრა ზვიადის მერე... უსამართლობის და ღალატის გამო გარდაიცვალა ეს კაცი, ყველა ამას ამბობს, ვინც იცნობდა", - გვეუბნება შაქრო როგავას ცოლი.

გული წყდება, რომ მისმა ქმარმა ვერ იხილა მისთვის საოცნებო, "ბოლომდე თავისუფალი ქვეყანა" და დიდი სურვილი აქვს, ახალგაზრდებმა საკუთარი გმირი წინაპრების შესახებ მეტი ინფორმაცია მიიღონ. ახლა ასოციაცია "ათინათის" მიერ შაქრო როგავას დღემდე გამოუქვეყნებელი ნამუშევრების 26 მაისს დაგეგმილი გამოფენისთვის ემზადება და ამბობს, რომ იქ მისული ადამიანები სურათებზე ძალიან ბევრ ნაცნობ სახეს იპოვიან.

"ახალგაზრდები უნდა მოვიდნენ, რომ ნახონ როგორი ერთიანი და ერთსულოვანი იყო მაშინდელი თაობა, რომელიც საქართველოს დამოუკიდებლობას ითხოვდა და აპროტესტებდა რუსეთის ოკუპაციას. მათ შეიძლება ფოტოებზე დედები, მამები ამოიცნონ. ვისურვებდი, რომ ახალ თაობას ჰქონდეს მშვიდობა, თავისუფლება და რაც მთავარია იცხოვროს ერთიან ქვეყანაში. მინდა მადლობა გადავუხადო მათ, ვინც ჩვენი ოჯახისთვის ძალიან მნიშვნელოვანი საქმე გააკეთა. "ათინათის" ხელმძღვანელები, რუსიკო ყალიჩავა და გია ხასია რომ მოვიდნენ, ისე აღფრთოვანებული ვიყავი, არ ვიცოდი რა მეთქვა, რა სიტყვა გამომეძებნა...როგორ გამომეხატა ჩემი სიხარული. დღეს მე ბედნიერი ვარ, მადლობა "ათინათს" და გამოფენის ყველა მხარდამჭერს, მაია კალანდიას, რომელიც შაქროსთვის იყო დასავით. ჩემს ქმარს ბევრი აქვს გაკეთებული ქალაქისთვის, ეს ბევრს შეიძლება ახსოვს, ბევრს კი არა... სიკეთით იყო სავსე, უზომოდ უყვარდა ქალაქი და ხალხი, არ ითხოვდა ნაშრომის შეფასებას, გაზეთ "აღდგომაშიც" კი ასე ეწერა - ჩუმი პატრიოტი. აკეთებდა ყველაფერს ქვეყნისთვის და ხალხისთვის. 3 შვილი გვყავს, 7 შვილიშვილი და 3 შვილთაშვილი უკვე, მენანება რომ შაქრო ვერ მოესწრო ამ სიხარულს ბოლომდე", - აღნიშნა ჩვენმა რესპონდენტმა.

26 მაისს, 16:00 საათზე, ზუგდიდის ბოტანიკურ ბაღში, საქართველოს დამოუკიდებლობის დღის აღსანიშნავად ასოციაცია "ათინათი" ეროვნულ-განმათავისუფლებელი მოძრაობის ამსახველი, შაქრო როგავას მიერ გადაღებული და დღემდე გამოუქვეყნებელი ფოტოების გამოფენას აწყობს. ფოტოებზე აღბეჭდილია ზუგდიდში, სოხუმსა და საქართველოს სხვა ქალაქებში ეროვნული მოძრაობის ლიდერების ორგანიზებით გამართული მიტინგები.