აფხაზეთი მზადაა მილიონი ტურისტის მისაღებად, ამის შესახებ ადგილობრივ მედიას დე ფაქტო აფხაზეთის ტურიზმისა და კურორტების საკითხების მინისტრმა ავთანდილ ღარწკიამ განუცხადა. მისი თქმით, ტურიზმის პროგნოზირება რთულია, ვინაიდან ის მრავალ ფაქტორზეა დამოკიდებული, იქნება ეს ამინდი, ქვეყნის ეკონომიკურ-პოლიტიკური მდგომარეობა თუ სხვა.

„საგულისხმოა, რომ ჩვენი უწყების გარდა საერთაშორისო ტურისტული სააგენტოებიც მთელი დატვირთვით მუშაობენ. ამიტომ, ვფიქრობ, რომ ტურისტების სიმრავლით ამ წლის მაჩვენებლები წინა წლის მაჩვენებლებს მნიშვნელოვნად გადააჭარბებენ, სადღაც 30-40 პროცენტით, ტურისტებისა და ერთდღიან ექსკურსიებზე ჩამოსულთა რაოდენობით. მიმდინარე სეზონისთვის აფხაზეთში მილიონ დამსვენებელს ველოდებით.“ - განაცხადა ღარწკიამ. მისი მონაცემებით, დე ფაქტო აფხაზეთს გასულ წელს 650 ათასამდე ტურისტი ეწვია , მათგან 500 ათასმა - კერძო სექტორი არჩია. ,,ჩვენ ყველანაირი პირობები უნდა შევქმნათ, რათა ტურისტებმა კომფორტულად დაისვენონ. ამისათვის კი საჭიროა საზღვარზე გადმოსვლის რეჟიმის გამარტივება, სამგზავრო ტრანსპორტის გამართვა, სტუმრების უსაფრთხოების უზრუნველყოფა, ქალაქის სისუფთავის დაცვა და ინფრასტრუქტურის მოწყობა.“ - აღნიშნა ავთანდილ ღარწკიამ.

მისი განცხადებით, დღეისთვის აფხაზეთში, 15 ათას ადგილზე გათვლილი, 100 სასტუმრო და პანსიონატი ფუნქციონირებს. აფახაზური მედიის ინფორმაციით, რუსეთის ტერიტორიაზე ჩატარებული კვლევების მიხედვით, „აფხაზეთის კურორტები 2015 წლისთვის რუს ტურისტებს შორის პოპულარობის მხრივ მესამე ადგილზეა. ბოლო წლების განმავლობაში, აფხაზეთის კურორტების მიმართ განსაკუთრებული ინტერესით თათრეთის რესპუბლიკის მოქალაქეები გამოირჩევიან“.