თვითაღიარებული აფხაზეთის მთავრობის ხელმძღვანელმა არტურ მიქვაბიამ სამუშაო თათბირი ჩაატარა , რომელიც გალის რაიონის განვითარების პრობლემებს მიეძღვნა.

გალის რაიონის ადმინისტრაციის ე.წ. ხელმძღვანელმა თემურ ნადარაიამ სტატისტიკური მონაცემები მოიყვანა. მისი თქმით, გალის რაიონი ერთ-ერთი ყველაზე დეპრესიულია, 2014 წელს მისი ბიუჯეტი 31 მლნ. რუბლს შეადგენდა, ბიუჯეტის 70% – სოხუმიდან მიღებული დოტაციებია. ამასთან, მოსახლეობის სიმჭიდროვით, მას სოხუმის შემდეგ მეორე ადგილი უჭირავს: 1 კვადრატულ მეტრზე 58 ადამიანი ცხოვრობს. 30 ათასიანი მოსახლეობიდან – 18 ათასი შრომისუნარიანია, მშპ - 107 მლნ. რუბლია, სამრეწველო-საწარმოო პროდუქციის მოცულობა - 26,5 მლნ. რუბლია, 101,4 მლნ. რუბლი – საცალო საქონლის ბრუნვაა, მოგება სულ – 5,1 მლნ. რუბლი.

ნადარაია ფიქრობს, რომ რაიონის ყველაზე დიდი პრობლემა - ოკუპაციის ხაზის გამაგრება და გზების მშენებლობაა. მან აღნიშნა, რომ რაიონულ ცენტრამდე მისვლა ადგილობრივებისთვის საქართველოს მიერ კონტროლირებადი ტერიტორიის გავლით უფრო მოსახერხებელია. რაიონში 8 საფელდშერო პუნქტია, რომლებსაც მედიკამენტებითა და სამედიცინო აღჭურვილობით საქართველოს ხელისუფლება ამარაგებს, ხოლო მედპერსონალს აფხაზეთის ავტონომიური რესპუბლიკის მთავრობა ნიშნავს. «რეგიონს განსაკუთრებული სტატუსი სჭირდება. პრობლემების გადასაწყვეტად უნდა მივიღოთ კანონი «საზღვრისპირა გალის რაიონის შესახებ», – ხაზი გაუსვა თემურ ნადარაიამ. რაიონის პერსპექტივებზე საუბრისას მიქვაბიამ აღნიშნა, რომ ეკონომიკური ეფექტის მიღება გალის რაიონში მცირე ზომის მაღალტექნოლოგიური საწარმოების შაქმნის შედეგად გახდება შესაძლებელი. მათი განვითარებისთვის, უკვე განსაზღვრულია საკრედიტო კვოტა– 15 მლნ. რუბლი. მომავალში ეს თანხა თანდათანობით გაიზრდება. გარდა ამისა, «აუცილებელია გაირკვეს, რომელი სასოფლო-სამეურნეო კულტურების განვითარებაა აქ შესაძლებელი“. მისი ინფორმაციით, ადგილობრივი მოსახლეობის შემოსავლის მთავარ წყაროს, მეთხილოება წარმოადგენს, «თუმცა, არ არის აღრიცხული, ვის და სად მიაქვს თხილი და რა გადასახადებს იხდის... მთავარია, სწორად განისაზღვროს ამოცანები, ამაღლდეს ადმინისტრირების როლი»,  – თქვა მიქვაბიამ. გალის რაიონის მცხოვრებლებს „საგადასახადო“ წესები გააცნეს