მოლდოვის ხელისუფლებამ რეისიდან დე ფაქტო აფხაზეთის ოფოციალური დელეგაცია მოხსნა. „გარდა ამისა, მისმა უსაფრთხოების სამსახურმა ინტერვიუები ჩაატარა და დაკავებულ ოფიციალურ პირებზე ფსიქოლოგიური ზეწოლა სცადა", - წერს „სპუტნიკ აფხაზია“. ამავე ინფორმაციით, შედეგად, აფხაზეთის დელეგაცია მოლდოვიდან დეპორტირებულ იქნა და დელეგაციის წევრებს 10 წლით ქვეყანაში შესვლა აეკრძალათ. "აფხაზეთის საგარეო საქმეთა სამინისტრო მოლდოვას პროტესტს უცხადებს და მის ქმედებებს აფხაზეთის თანამდებობის პირთა მიმართ, დაუშვებელსა და დისკრიმინაციულს უწოდებს და მიმართავს საერთაშორისო საზოგადოებას, ასევე მოლდავეთ-დნეპრისპირეთის კონფლიქტის დარეგულირების პროცესში მონაწილე საერთაშორისო შუამავლებს, მომხდარი ობიექტურად შეაფასონ და მომავალში მოლდოვის მხრიდან მსგავსი ქმედება არ დაუშვან", - ნათქვამია ე.წ. საგარეო უწყების განცხადებაში. დე ფაქტო აფხაზეთის ოფიციალური დელეგაციამ, ე.წ. ვიცე პრეზიდენტის ვიტალი გაბნიას ხელმძღვანელობით, ტირასპოლში მოლდავეთის დნეპრისპირეთის რესპუბლიკის ჩამოყალიბებიდან 25 წლისთავისადმი მიძღვნილ ღონისძიებაში მონაწილეობდა. მოლდოვის ხელისუფლების განცხადებით, მათი მხრიდან აღნიშნულ ქმედებებს საფუძვლად ის ფაქტი დაედო, რომ ტირასპოლში საზეიმო ღონისძიებებში მონაწილეობით, აფხაზეთისა და სამხრეთ ოსეთის დელეგაცია, ძირს უთხრის მოლდოვის ტერიტორიულ მთლიანობას,- წერს გამოცემა. "მოლდოვის ხელისუფლება, რომელიც მჭიდრო კავშირშია საქართველოსთან, საქართველოს იდენტურ პოლიტიკას ატარებს, რომელიც მიმართულია მეზობელი სახელმწიფოებისა და მათი მოქალაქეების იზოლაციისა და დისკრიმინაციისკენ,. მოლდოვის მხრიდან ზემოთ აღწერილი პროვოკაციული ქმედება პირდაპირ ეწინააღმდეგება ადამიანის უნივერსალურ უფლებას გადაადგილების თავისუფლებაზე", — აღნიშნეს დე ფაქტო აფხაზეთის საგარეო საქმეთა სამინისტროს განცხადებაში.