დე ფაქტო აფხაზეთში ბოლო დროს მიღებულ "კანონს" "რესპუბლიკური და მუნიციპალური ქონების პრივატიზაციის" შესახებ, სოციალურ ქსელებში დისკუსია მოყვა. განსაკუთრებით, იმ ნაწილს, რომელიც პრივატიზაციის პროცესში უცხოელი ფიზიკური და იურიდიული პირების მონაწილოებას" ეხება.

ამასთან დაკავშირებით, დე ფაქტო აფხაზეთის პრეზიდენტის პრეს-სამსახურმა განცხადება გაავრცელა, რომელშიც განმარტა, რომ "1997 წლიდან მოქმედი კანონი პრივატიზაციის შესახებ, არ კრძალავდა და არც ზღუდავდა უცხოელი მოქალაქეების სახელმწიფო ობიექტების პრივატიზაციის პროცესში მონაწილეობას".

ამავე ცნობით, განსხვავებით ძველი "კანონისგან", დე ფაქტო აფხაზეთში 2017 წლის 1 იანვრიდან, ამოქმედდება "კანონი", რომელიც "პირველად ითვალისწინებს, სამართლებრივ შეზღუდვებს უცხოელების მიერ სახელმწიფო ქონების შეძენასთან დაკავშირებით".

გარდა ამისა, ახალი "კანონი" გამორიცხავს სახელმწიფო ქონების პრივატიზაციას პირდაპირი შესყიდვის გზით და ითვალისწინებს პრივატიზაციის უფრო ცივილიზებულ მეთოდებს, კერძოდ, აქციონირებას, კონკურსს და აუქციონს.

ასევე, გათვალისწინებულია "ოქროს აქციის" დაწესება, რომელიც "სახელმწიფოს უფლებას მისცემს გავლენა შეინარჩუნოს "სახელმწიფოს აქციონირებული დაწესებულებების გასხვისების პროცესზე, ქვეყნის თავდაცვისუნარიანობის უზრუნველყოფისა და რესპუბლიკის მოქალაქეთა ინტერესების დაცვის მიზნით".