სტატია
შეუსაბამობა დოკუმენტაციაში თუ "დაწუნებული" შემსრულებლები - რატომ ჩაიშალა ზუგდიდის მერიის ტენდერი
რამდენიმე დღის წინ განმუხურში ახალგაზრდობის დღესთან დაკავშირებული კონცერტი გაიმართა, რისთვის თანხა ადგილობრივი ბიუჯეტიდან გამოიყო. მერიის მიერ გამოცხადებულმა ტენდერმა, პირობებმა და შედეგებმა ერთ-ერთი მონაწილისთვის კითხვის ნიშნები გააჩინა.

შესყიდვების სააგენტოს ვებგვერდის თანახმად, ღონისძიებამდე რამდენიმე კვირით ადრე საკონცერტო ნაწილის ორგანიზებისთვის გამოცხადებულ ტენდერში შესყიდვის სავარაუდო ღირებულებად 37 245 ლარი მიუთითეს. დოკუმენტაციის მიხედვით, გამარჯვებულ კომპანიას 4-5 წევრისაგან შემდგარი ცნობადი, არანაკლებ 4 სტუდიური ალბომის მქონე ინსტრუმენტალური ბენდი უნდა ჩამოეყვანა, რომლის მუსიკალური პროგრამა ინდი ან/და არტ-როკის მიმდინარეობის ქართულ და უცხოურ კომპოზიციებს მოიცავს.

ტენდერში ორმა პრეტენდენტმა - ინდ. მეწარმე ანა ტაბატაძემ და შპს "ჯითი ჰოლდინგმა" მიიღო მონაწილეობა. ტაბატაძემ მუნიციპალიტეტს 28 900 ლარად ჯგუფ "ურსას", ხოლო მისმა კონკურენტმა 36 110 ლარად Bedford Falls-ის ჩამოყვანა შესთავაზა.

8 აგვისტოს, სატენდერო კომისიის გადაწყვეტილებით, უფრო დაბალი ფასის მქონე პრეტენდენტი, ანა ტაბატაძე დისკვალიფიცირდა ტექნიკური დოკუმენტაციის სატენდერო პირობებთან შეუსაბამობის გამო. რაც შეეხება მეორე მონაწილეს, სატენდერო სხდომის ოქმში ვკითხულობთ, რომ ამ შემთხვევაში დოკუმენტაცია სრულყოფილად არ შეესაბამებოდა მოთხოვნებს და საჭიროებდა დაზუსტებას, რისთვისაც საკმარისი დრო არ რჩებოდა. ტენდერი 9 აგვისტოს შეწყდა.

მომდევნო დღეს, 10 აგვისტოს მერიამ გამარტივებული შესყიდვით "ჯითი ჰოლდინგის" მომსახურება 35 990 ლარად შეიძინა. განმარტებაში მითითებულია, რომ შესყიდვის გადაუდებელი აუცილებლობა მას შემდეგ დადგა, რაც ტენდერის მიმდინარეობის გაუთვალისწინებელმა გარემოებამ იჩინა თავი.

ინდ.მეწარმე ანა ტაბატაძე, რომელიც ზუგდიდის მერიის მიერ გამოცხადებულ ტენდერში მონაწილეობდა, ეჭვობს, რომ მერიამ შესყიდვების პროცესი იმდაგვარად წარმართა, რომ ტენდერში აუცილებლად მისთვის სასურველ კომპანიას გაემარჯვა.

მერიაში რომ "ურსას" ჩამოყვანის წინააღმდეგები თავიდანვე იყვნენ, ეჭვი არ ეპარება დისკვალიფიცირებული პრეტენდენტის წარმომადგენელს თეონა ლალიევსაც. ის მიიჩნევს, რომ ტენდერი ხელოვნურად ჩაშალეს.

"ტექნიკური დოკუმენტის დაუზუსტებლობის გამო მოგვენიჭა დისკვალიფიკაცია. გვქონდა მექანიკური შეცდომა, გეტყვით უფრო კონკრეტულადაც - პირობების მიხედვით უნდა ჩამეტანა ლედ ეკრანი, გვეწერა, რომ ჩამოვიტანდით 15 კვ.მ ან მეტს და ეს ჩაითვალა, როგორც არაზუსტი. ერთი სიტყვის გამო მომცეს დისკვალიფიკაცია. პრობლემა კი იყო ბენდთან დაკავშირებითაც, "ურსა" არ უნდოდათ და ყველანაირად ცდილობდნენ ხელი შეეშალათ. რაღაცა პირადი ინტერესები რომ იკვეთებოდა, მივხვდი. "ხალხის მოთხოვნით და გამოკითხვითო" - ამას პატარა ბავშვიც არ დაიჯერებს. შევთავაზე "ურსა", უფრო მრავალფეროვანი რეპერტუარით, მგონია, რომ ზუგდიდში ბევრს უყვარს. წლებია, ამ მიმართულებით ვმუშაობთ და ეს არ არის პირველი შემთხვევა, ყველასი მესმის, მაგრამ თავხედურად, საჯაროდ რომ ფეხს გამოგიკრავენ, არ შეიძლება. ტენდერი არის კონკურენცია, ყველას გვაქვს უფლება მივიღოთ მონაწილეობა და წარვადგინოთ ჩვენი პირობები. გვქონია ისეთი შემთხვევაც, როცა ღონისძიება გააუქმეს, გვითხრეს, რომ კოვიდის გამო, მაგრამ მიზეზი იყო რეალურად ის, რომ ბენდი არ უნდოდათ. ასევე საინტერესოა ის, რომ როგორც კი მოვიგეთ, დაუკავშირდნენ ჩვენი გვერდის ავლით ჯგუფის წევრს და უთხრეს, რომ, აი, თქვენი ჩამოყვანა უნდათ და აკმაყოფილებთ თუ არა მოთხოვნებსო. მოგვიანებით დავურეკე და ვუთხარი, რომ ორგანიზატორი მე ვარ, შელაპარაკებაც მოგვივიდა, ეს ბენდი არ გვინდოდაო მითხრა შესყიდვების სამსახურმა", - ამბობს ივენთ-მენეჯერი.

აღნიშნულს კატეგორიულად არ ეთანხმებიან მერიის შესყიდვების სამსახურში, სადაც განგვიმარტეს, რომ დაზუსტების ეტაპზე პრეტენდენტმა მათი შენიშვნა არ გაითვალისწინა.

"შეუსაბამობა იყო ტექნიკურ დავალებაში. სატენდერო პირობაში გვეწერა, რომ უნდა იყოს კონკრეტული მაჩვენებლები მითითებული. ანუ აპარატურა არანაკლებ ამდენი მოცულობის, ამ მაჩვენებლების, რაც არ გაითვალისწინეს. რაც შეეხება გამარტივებულ შესყიდვას, ტენდერი შეწყდა, როგორც არის კანონმდებლობით გათვალისწინებული, გაფორმდა გამარტივებული წესით. სააგენტოსთან იყო წარდგენილი დოკუმენტაცია შესყიდვის აუცილებლობაზე და გაფორმდა ხელშეკრულება", - გვეუბნება სამსახურის უფროსი ბესიკ ქარდავა.

კითხვაზე რატომ არ გაუფორმდა გამარტივებული შესყიდვა ანა ტაბატაძეს, ის გვპასუხობს:

"აქ იყო კიდევ საუბარი ღონისძიების ფორმატზე და შინაარსზე - ჯგუფზე მაგალითად, შემსრულებლების თაობაზე იყო მოთხოვნები. (ანუ "ურსა" არ იყო მისაღები? - ათინათი) დიახ, ასე შეიძლება გავიგოთ...მე როგორც ვიცი, ეს იყო ახალგაზრდების დაკვეთა. რა ეჭვს აღძრავს ეს? ტენდერში რა მოთხოვნაც იყო, ვერ შეასრულა. მისი (ტაბატაძის) დაუდევრობით მოხდა ეს", - ამბობს მერიის წარმომადგენელი.

"საერთაშორისო გამჭვირვალობა-საქართველოს" ზუგდიდის ოფისის ხელმძღვანელის არჩილ თოდუას თქმით, თუკი კითხვის ნიშნები არსებობს, ამ კონკრეტული ტენდერით შესაბამისი ორგანოები უნდა დაინტერესდნენ.

"კონკრეტულ ტენდერთან მიმართებაში თუკი არსებობს რაიმე სახის კითხვები და ჩნდება ეჭვები მერიის მხრიდან მომსახურების მიმწოდებლის უპირატეს მდგომარეობაში ჩაყენებასთან დაკავშირებით, ერთის მხრივ, ზუგდიდის მერიამ, როგორც მომსახურების შემსყიდველმა, უნდა გასცეს კითხვებს ამომწურავი პასუხები, ასევე შესაბამისმა ორგანოებმა უნდა დაადგინონ იყო თუ არა რამეს სახის კანონდარღვევა", - ამბობს თოდუა.

ორგანიზაციაში შესაბამის უწყებებს მოუწოდებენ, ნებისმიერი სახელმწიფო შესყიდვის პროცესი წარიმართოს გამჭვირვალედ და კანონის მოთხოვნათა შესაბამისად.

Print Email
FaceBook Twitter
რ ე კ ლ ა მ ა
29 ნოემბერს, ქალთა მიმართ ძალადობის წინააღმდეგ ბრძოლის გლობალური კამპანიის ფარგლებში, ქალთა ფონდი „სოხუმის“ ახალი მონიტორინგის ანგარიშის - „ბავშვთა უფლებების დაცვის და მხარდაჭერის განყოფილებების ეფექტიანობის შეფასება და არსებული გამოწვევები“ პრეზენტაცია გაიმართა.
ზუგდიდის ცენტრალურ ბიბლიოთეკაში წიგნების სერიის "ჩემი მეგრული ჯადოსნური ზღაპრების" პირველი წიგნის "კაჟანდიი ქერქუუს არიკის" პრეზენტაცია გაიმართა.
ქალთა ფონდი „სოხუმმა“ ახალი მონიტორინგის ანგარიში - „ბავშვთა უფლებების დაცვის და მხარდაჭერის განყოფილებების ეფექტიანობის შეფასება და არსებული გამოწვევები“ გამოაქვეყნა.
საზოგადოება
ზუგდიდში თანამედროვე ხელოვნების ფესტივალი "f 5" განახლდა. ფესტივალის პირველი სტუმარი მოდერატორთან ერთად მწერალი ნენე კვინიკაძეა.
ზუგდიდის მუნიციპალიტეტის მერიის სოციალური დაცვის და გენდერული თანასწორობის განყოფილების უფროსი გოგი რევია, პარლამენტის გენდერული თანასწორობის საბჭოს კონკურსის
"საქართველოს მუზეუმელთა ალიანსის" პირველ ყრილობაზე, რომელიც თბილისში გაიმართა, ქართულ სამუზეუმო ისტორიაში პირველად, 3 "საუკეთესო მუზეუმელი" გამოავლინეს,
ამავე კატეგორიაში
დღის სიახლეები
04 / დეკემბერი 2022
ზუგდიდში ოჯახი და ახლობლები 24 წლის საბა კვირკვიას მესამე დღეა ეძებენ. რადიო “ათინათის” ინფორმაციით, ის ბოლოს პარასკევს, დღის პირველ ნახევარში ნახეს, რის შემდეგაც მისი კვალი იკარგება.
04 / დეკემბერი 2022
ზუგდიდის სოფელ ჩხორიაში ერთ-ერთი ადგილობრივის საცხოვრებელი დაიწვა. ადგილობრივების ინფორმაციით, სახლში შუახნის მამაკაცი ცხოვრობს,
04 / დეკემბერი 2022
უკრაინაში, ბახმუტთან სარაკეტო თავდასხმის შედეგად დაღუპული აფხაზეთიდან დევნილი მებრძოლების ოჯახების სურვილი მხოლოდ ის არის,
დილის ჩართვა
მთავარი საინფორმაციო გამოშვება
არქივი
«« დეკემბერი 2022 »»
282930 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1
ამინდი
ზუგდიდი 5 °C
img
სოხუმი 7 °C
img
ფოთი 9 °C
img
მესტია -3 °C
img
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.