ვატიკანში ორშაბათს რომის კათოლიკური ეკლესიის კარდინალებმა, პაპის არჩევამდე დასკვნითი თათბირი ჩაატარეს. დღეს 115 კარდინალი, რომელთა ასაკი 80 წელს არ აღემატება, ვატიკანის სასტუმროს იზოლირებულ შენობაში გადავა, სადაც ფარული კენჭისყრა გაიმართება. მოგვიანებით, წმინდა პეტრეს სამლოცველოში ისინი წირვას აღავლენენ. საუზმის შემდეგ ამომრჩევლები სიქსტის კაპელაში შეიკრიბებიან, სადაც დღეს საღამოს 19: 30 საათზე პირველი კენჭისყრა შედგება. ხმის მიცემისას გამოყენებულ ბიულეტენებს დაწვავენ, ხოლო კვამლი, რომელიც საკვამურებიდან გამოჩნდება, სავარაუდოდ შავი ფერის იქნება. ეს იმას ნიშნავს, რომ პაპი ჯერ არ აურჩევიათ, წერს BBC. რომში ამ დღეებში არნახული ხალხმრავლობაა. სასტუმროები გადავსებულია. ოფიციალური ინფორმაციით, კონკლავს ადგილზე 5 ათასამდე ჟურნალისტი დააკვირდება. მიუხედავად იმისა, რომ ფავორიტი არ დასახელებულა, ექსპერტების აზრით, ბენედიქტ XVI-ს მემკვიდრის ვინაობა არაუგვიანეს პარასკევისა გახდება ცნობილი.