დე ფაქტო აფხაზეთის პრემიერ-მინისტრმა არტურ მიქვაბიამ განაცხადა, რომ სოხუმს აინტერესებს, თუ როდის დაიწყებს „როსნეფტი“ კონტრაქტით გათვალისწინებული პირობების შესრულებას და აფხაზეთში ნავთობის მოპოვების პროექტს.

„როსნეფტისგან“ ქმედებებს ველოდებით, თუ როდის დაიწყებენ პროექტის განხორციელებას. ვადა იწურება, ჩვენ ეს დიდად არ მოგვწონს და ამ საკითხზე განმარტებების მიღება გვსურს“, -  განმარტა მან. 

მიქვაბიას თქმით, ამ ეტაპზე ისინი სხვა ქვეყნების ნავთობმომპოვებელი კომპანიების აფხაზეთში დაშვებაზე არ ფიქრობენ. „თუ „როსნეფტი“ არაფერს მოიმოქმედებს, მაშინ რა თქმა უნდა, დავფიქრდებით. თუ საქართველოში, შავ ზღვაზე დაიწყება ნავთობის მოპოვება, თუ სოჭში დაიწყება, რუმინეთში, ბულგარეთში, თუ თურქებიც იწყებენ მოპოვებას, მაშინ ჩვენთვის უმოქმედოდ ყოფნა სწორი არ იქნებოდა“, - აღნიშნა დე ფაქტო აფხაზეთის პრემიერ მინისტრმა.

„როსნეფტმა“ აფხაზეთში საქმიანობის შეჩერება გასული წლის ივლისში გადაწყვიტა. მაშინ კომპანიაში განაცხადეს, რომ მათ აფხაზურ მხარესთან ნავთობის მოპოვების საკითხზე გაფორმებული შეთანხმების შესწავლა სურთ.