ანაკლია-განმუხურის ინფრასტრუქტურული პროექტების განსახორციელებლად რეგიონული განვითარების ფონდიდან 2 მილიონ ლარამდე დაიხარჯება.  ფონდიდან დასაფინანსებელი პროექტების შესახებ საკრებულოს ურბანული განვითარების და ქონების მართვის საკითხთა კომისიის თავმჯდომარემ ირაკლი ლაგვილავამ ისაუბრა. საკითხს დეპუტატებმა მხარი ერთხმად დაუჭირეს.

აღნიშნული პროექტის ფარგლებში შემდეგი სამუშაოები განხორციელდება:

ანაკლია-განმუხურის ტერიტორიიდან ზღვის სანაპირომდე მისასვლელი ბილიკების დაგება;

ბულვარის ტერიტორიაზე განთავსებული მინი ფეხბურთის და კალათბურთის მოედნების რეაბილიტაცია;

ანაკლია განმუხურის დამაკავშირებელი ხიდის რეაბილიტაცია;

საველოსიპედე ბილიკის, ველოსადგომის მოწყობა, რეაბილიტაცია და მშენებლობა, ველოსიპედების შეძენა;

ანაკლია განმუხურის სანაპირო ბულვარის ტერიტორიაზე არსებული განათების, საკანალიზაციო - გამწმენდი ნაგებობის, საპირფარეშოების, მოწესრიგება;

ბულვარის ტერიტორიაზე 100 ცალი საშუალო ზომის სანაგვე ურნა დამონტაჟება;  

ანაკლია-განმუხურის პლაჟზე გასახდელის მოწყობა;

არსებული კაფე-რესტორნების და ამფითეატრის რეაბილიტაცია;

„რეგ- ფონდიდან განსახორციელებელ პროექტებს კიდევ დაემატა რამდენიმე პროექტი. ეს არის ანაკლია-განმუხურის ინფრასტრუქტურული რეაბილიტაცია, რათა საკურორტო სეზონზე ღირსეულად წარვსდგეთ ვიზიტორების წინაშე. ამ პროექტის ღირებულება არის სავარაუდოდ  2 მილიონ ლარამდე“, - აღნიშნა საკრებულოს თავმჯდომარემ მამუკა წოწერიამ.

აღნიშნული პროექტის ფარგლებში ასევე გათვალისწინებულია ზუგდიდის მუნიციპალიტეტში გამწვანების სამუშაოების ჩატარება, ბაღის სკამების და მინი სკვერების განახლება და ურბანული ფურნიტურის შესყიდვა. ასევე იგეგმება ვეტერანთა ხეივნის მოწყობა.