სენაკელი გიორგი ადამია, რომელიც შვილთან, 6 წლის თომასთან ერთად შოვში 3 აგვისტოს მეწყერში მოყვა და გადარჩენისთვის, დაახლოებით, ოთხი საათი იბრძოდა, „ქართული ოცნების“ თავმჯდომარეს ირაკლი კობახიძეს პასუხობს. კობახიძის იმ განცხადების საპასუხოდ, სადაც მმართველი პარტიის თავმჯდომარე ამბობს, რომ „იყო სპეკულაციები, არასწორი ინფორმაცია ვრცელდებოდა იმასთან დაკავშირებით, რომ თითქოს ერთ-ერთი ბავშვი 3 საათი ებრძოდა ღვარცოფს - საუბარი იმაზე, რომ ვიღაც 3 საათი ებრძოდა სტიქიას, უბრალოდ არის ცარიელი ტყუილი“, ადამიამ სოციალურ ქსელში პოსტი გამოაქვეყნა.


„ჩემი თვალით ვხედავდი, როგორ დაცოცავდა ტასო მეწყერში სამ საათზე მეტხანს, ვერ მიდიოდა, გაწვა, ყველაფერი სცადა. ჩვენ ვიდექით კალცის წყალთან ხიდზე, იქ ყველაფერი მეწყერმა დაფარა ნახევარ წუთში. ოდნავ შემაღლებულისკენ რომ გავიწიეთ, ისევ მეწყერმა გადაგვიარა და 20 მეტრზე მეტი გვათრია. დავითი და მაშო უფრო შორს წაიყვანა. ჩვენს ირგვლივ ყველგან მეწყერი იყო, გაყინულ ტალახში ვიდექით და ველოდებოდით ვერტმფრენს 4 საათი. ირაკლი კობახიძე / Irakli Kobakhidze შენ არ განგიცდია, რას ნიშნავს ბავშვი ზურგზე გეჯდეს და მუხლამდე ეფლობოდე მეწყერში, ყოველ ფეხის ჩადგმაზე ქვები გსერავდეს, სიარულის ძალა არ გქონდეს, ყოველ წამს ახალი ტალღის გეშინოდეს. არც ის განგიცდია ბავშვით ხელში, შენ წინ მეწყერის ორ მეტრიან ტალღას უყურებდე, ხედავდე, როგორ მოიწევს შენკენ და ვერსად გარბოდე. სიცოცხლისთვის ბრძოლა სპეკულაცია არ არის!“, - დაწერა ადამიამ.

რამდენიმე დღის წინ მან რადიო „ათინათს“ დეტალურად მოუყვა მისი, მისი შვილისა და კიდევ 12 მეწყერში მოყოლილი ადამიანის გადარჩენის ამბავი.