სოხუმში აცხადებენ, რომ მოსახლეობის გამრიცხველიანება გრძელდება. კომპანია „ჩერნომორენერგოს“ წარმომადგენელმა, დაურ ფიფიამ ადგილობრივ მედიას განუცხადა, რომ ამ ეტაპზე, აფხაზეთის დე ფაქტო რესპუბლიკაში, საკუთარი ძალებით, 25 000 მრიცხველი დაამონტაჟეს.

მისივე თქმით, შედეგად, მათ 2023 წლიდან 300 000 კვტ.სთ - ის დაზოგვა მოახერხეს, რაც „კარგი შედეგია, იმის გათვალისწინებით, რომ აბონენტების მაქსიმუმ 10% - ია გამრიცხველიანებული“.

20 აპრილის ჩათვლით, აფხაზეთის მოსახლეობას, ელექტროენერგია შეზღუდვებით მიეწოდებოდა. რუსეთის ფედერაციიდან ელექტროენერგიის მიწოდების მოცულობის შემცირების გამო, თვითაღიარებული აფხაზეთის მთელ ტერიტორიაზე გრაფიკი ზამთრის თვეებსა და მარტშიც მოქმედებდა.

უკვე წლებია, სოხუმი ენერგოდეფიციტის აღმოფხვრას ვერ ახერხებს. ადგილობრივი ენერგოკომპანია ამის მიზეზად ელექტროქსელებზე გაზრდილ დატვირთვას და ინფრასტრუქტურის ცვეთას, სრული გამრიცხველიანების არარსებობას, ელექტროენერგიაზე დაბალ ტარიფებს, მოსახლეობის ნაწილის მიერ ელექტროენერგიის საფასურის გადაუხდელობას და კრიპტოვალუტის უკანონო მაინინგს ასახელებს.

ინფორმაციისთვის, ზამთრის თვეებში ენგურჰესი, ძირითადად, აფხაზური მხარის საჭიროებებს აკმაყოფილებდა. მხარეებს შორის არსებული შეთანხმება გამომუშავებული რესურსის 60/40-ზე პარიტეტით გადანაწილებას გულისხმობს.