სოხუმის მილიციის თანამშრომელს, რომელიც სამსახურებრივი უფლებამოსილების გადამეტებაშია ეჭვმიტანილი, ე.წ. პროკურატურის შუამდგლომლობით, წინასწარი პატიმრობა შეუფარდეს.

სოხუმის ე.წ. პროკურატურამ მილიციის ლეიტენანტ მანჩი კიახბას წინააღმდეგ სისხლის სამართლის საქმე მას შემდეგ აღძრა, რაც აფხაზურმა ტელეგრამ - არხმა RESPUBLICA-მ სოხუმის ე.წ. მილიციის თანამშრომლის მიერ მამაკაცის ცემის კადრები გამოაქვეყნა.

„წინასწარი გამოძიების ორგანომ დაადგინა, რომ ქალაქ სოხუმის შინაგან საქმეთა სამმართველოს „მაიაკის“ მილიციის განყოფილების საგამოძიებო განყოფილების თანამშრომელმა, 2024 წლის 3 თებერვალს, სამუშაო ადგილზე ყოფნისას, დაკავებულ ასტამურ საბეკიას მუშტებით, სულ მცირე, 11 დარტყმა მიაყენა, რითაც დააზიანა შსს-ს პრესტიჟი“, - ვკითხულობთ ინფორმაციაში, რომელსაც აფხაზეთის დე ფაქტო რესპუბლიკის „გენერალური პროკურატურის“ პრესსამსახური ავრცელებს.  

აქვე დაზუსტებულია, რომ მოტივი შურისძიებაა საბეკიას ქმედებებისთვის - ეს უკანასკნელი მანამდე „ხელისუფლების წარმომადგენლებზე ძალადობისა და შეურაცხყოფის მიყენების ბრალდებით დააკავეს“.

ინფორმაციისთვის, მიმდინარე წლის მაისში გალში, ცემის შედეგად გარდაცვლილი, თემურ კარბაიას საქმეზე დაკავებული მილიციელები პატიმრობიდან გაათავისუფლეს.

დე ფაქტო რესპუბლიკის გენერალური პროკურატურის ინფორმაციით, გალის ე.წ. სასამართლომ მათ მიმართ წარდგენილი ბრალდება გადააკვალიფიცირა, „სამსახურებრივი გულგრილობის“ მუხლით, სასჯელის ზომად კი გირაო შეუფარდა, 50 – 50 ათასი რუბლის ოდენობით.

გალის რაიონის მკვიდრის, საქართველოს მოქალაქის, თემურ (ვიტალი) კარბაიას გარდაცვალებასთან დაკავშირებით, აფხაზეთის დე ფაქტო რესპუბლიკის ე.წ. შსს - ს სამი თანამშრომლის წინააღმდეგ სისხლის სამართლის საქმე მიმდინარე წლის თებერვალში აღიძრა, ორი მათგანი დააკავეს.

თემურ კარბაიას სიკვდილის შესახებ 2023 წლის 9 დეკემბერს გახდა ცნობილი. 43 წლის მამაკაცის ოჯახის წევრების ინფორმაციით, საქართველოს მოქალაქე, რომელიც დედასთან ერთად გალში ცხოვრობდა, ე.წ. მილიციამ გააჩერა და სასტიკად სცემა. მიყენებული ტრავმებით იგი კლინიკაში გარდაიცვალა.