წალენჯიხის მერის გია ხარჩილავას განცხადებით, მუნიციპალიტეტის მერიას ინფრასტრუქტურული პროექტებისთვის მიღებული გრანტი მას შემდეგ გაუუქმდა, რაც საქართველოს ხელისუფლებამ "უცხოური გავლენის გამჭვირვალობის შესახებ" კანონი მიიღო.

"პრაქტიკაში და ქმედებაში რას გვაძლევს ან რას გვართმევს "რუსული კანონი" დასავლეთთან ურთიერთობაში: წალენჯიხის მერიამ გრანტი მიიღო და იმის გამო, რომ ხელისუფლებამ ჯიუტად მიიღო "რუსული კანონი", გრანტი შეჩერებულია. ტურიზმის სტრატეგია წალენჯიხაში, ფაქტობრივად, გაუქმებულია. ჩვენ ჩავეხსენით ევროპას, ჩავეხსენით ჩვენს მეგობრებს, ჩავეხსენით დაფინანსებას და რაც აქ ხდება, ყველაფერი ჩვენს მიერ დეკლარირებულია, მაგრამ სხვა მუნიციპალიტეტები ამას არ აღნიშნავენ. მე თქვენ გეუბნებით, რომ წალენჯიხის მერიას გრანტი გაუუქმდა იმის გამო, რომ რუსული კანონი ჯერჯერობით, მოქმედებს საქართველოში", - თქვა მან მერიის წინ გამართულ ბრიფინგზე.

ხარჩილავამ წაიკითხა წერილი, რომელიც მერიამ მიიღო. მასში საუბარია გრანტის გაუქმებაზე და აღნიშნულია, რომ გადაწყვეტილების მიღების მიზეზს ადგილობრივ ხელისუფლებას აუცილებლად აცნობებენ.

შეგახსენებთ, 1 აგვისტოდან ე.წ უცხოელი აგენტების კანონი ძალაში შევიდა. ის არასამთავრობო და მედია ორგანიზაციების მიერ საჯარო რეესტრის ეროვნულ სააგენტოში უცხოური ინტერესების გამტარებელ ორგანიზაციად დარეგისტრირებას გულისხმობს და ის სავალდებულოა ყველა ორგანიზაციისთვის, რომლის მთლიანი შემოსავლის (1 წლის განმავლობაში) 20%-ზე მეტი უცხო ქვეყნისგან მიღებული დაფინანსებაა.

ინფორმაციისთვის, საქართველოს პარლამენტმა, 84 ხმით, კანონპროექტი პირველი მოსმენით - 17 აპრილს, მეორე მოსმენით - 1 მაისს, მესამე მოსმენით კი - 14 მაისს მიიღო. პრეზიდენტმა მას ვეტო 18 მაისს დაადო.

საკანონმდებლო ორგანომ პლენარულ სხდომაზე, კვლავ 84 ხმით, "უცხოური გავლენის გამჭვირვალობის შესახებ" კანონზე პრეზიდენტის ვეტო 28 მაისს დაძლია. მის გასაპროტესტებლად ქვეყანაში საპროტესტო აქციები პერმანენტულად მიმდინარეობდა, მოქალაქეების ნაწილი განმარტავს, რომ კანონის მიღებით ხელისუფლებამ დასავლური კურსიდან გადაუხვია.