სოხუმში საქართველოს პრემიერ - მინისტრის ირაკლი კობახიძის გაეროს გენერალურ ასამბლეაზე  გამოსვლას ეხმაურებიან.

„კიდევ ერთხელ მოვისმინეთ საქართველოს ხელმძღვანელობის რიტორიკა, რომელიც მორიგ ჯერზე იმეორებს მითიურ ტერმინებს. მიგვაჩნია, რომ თუ საქართველოს ხელმძღვანელობა იგივე სულისკვეთებით გააგრძელებს, წარსულის დაძლევაში პოზიტიურ შედეგებს ვერ მივაღწევთ“, - ნათქვამია განცხადებაში, რომელსაც აფხაზეთის დე ფაქტო რესპუბლიკის საგარეო საქმეთა სამინისტრო ავრცელებს.

კომენტარში სოხუმი მოუწოდებს თბილისს, „ხელი მოაწეროს იურიდიულად სავალდებულო დოკუმენტს ძალის გამოუყენებლობის შესახებ“ და აღიაროს აფხაზეთის “დამოუკიდებლობა”.

"მინდა, ვისარგებლო ამ შესაძლებლობით და მივმართო ჩვენს ხალხს საოკუპაციო ხაზის მეორე მხარეს, აფხაზეთისა და ცხინვალის რეგიონებში.
ჩვენი ყველა ნაბიჯი მიმართულია იმისკენ, რომ დავეხმაროთ ჩვენს ხალხს და ერთ დღეს ჩვენ, ჩვენს შვილებთან ერთად, შევძლოთ ერთად ცხოვრება ბედნიერ, გაერთიანებულ და განვითარებულ საქართველოში. საოკუპაციო ხაზის ამ მხარეს ჩვენ ყოველთვის გულღიად მიგიღებთ. ჩვენ უნდა აღვადგინოთ ყველა დანგრეული ხიდი ჩვენს ქვეყანაში," - თქვა პრემიერ - მინისტრმა ნიუ-იორკში, გაეროს გენერალური ასამბლეის 79 - ე სესიაზე გამოსვლისას. 

ირაკლი კობახიძის განცხადებით, მიუხედავად იმისა, რომ ქვეყნის ტერიტორიის 20% უკანონოდ ოკუპირებულია, გრძელდება წინსვლა და მუშაობა, რათა მომავალმა თაობებმა უკეთეს, უფრო ძლიერ და უფრო ღირსეულ საქართველოში იცხოვრონ.