მესტიის მუნიციპალიტეტის ფარის მე-2 საჯარო სკოლის ქართული ენისა და ლიტერატურის მენტორ-მასწავლებელი ეკატერინე წულუკიძე, რომელიც სოციალურ ქსელში პოლიტიკური ნიშნით დისკრიმინაციაზე საუბრობდა, მის წერილზე განათლების სამინისტროს პასუხს აქვეყნებს.

მისი თქმით, მან 20 ოქტომბერს სამინისტროში წერილი გააგზავნა, მესტიის მუნიციპალიტეტის რესურსცენტრის ხელმძღვანელი პირისგან განხორციელებული დისკრიმინაციის ფაქტზე.

როგორც წულუკიძე წერს, სამინისტროს პასუხის თანახმად, ღონისძიების ჩატარების ყველა ეტაპი უზრუნველყო მხოლოდ ადგილობრივი ორგანიზატორის მიერ და განათლების სამინისტროს მონაწილეობა არ მიუღია მესტიის მუნიციპალიტეტში მასწავლებლების დაჯილდოების ცერემონიის დაგეგმვაში და მასწავლებლების შერჩევაში.

"ვასკვნით, რომ 300 მდე მასწავლებლის წინაშე იცრუა რესურსცენტრის ხელმძღვანელმა,მარიამ ჯაფარიძემ და საქართველოს განათლების მეცნიერებისა და ახალგაზრდობის სამინისტროს დააბრალა,რომ ის ახორციელებს პედაგოგთა პერსონალურ მონიტორინგს,ერთ-ერთმა დეპარტამენტმა განიხილა წარდგენილ პედაგოგთა პირადი საქმეები და მათ ამოიღეს სიიდან არასასურველი კანდიდატები (48 წარდგენილი კანდიდატიდან 7 პედაგოგი) სამინისტროს ბრალი დასდო პედაგოგთა პერსონალურ მონიტორინგში!

ღონისძიება ორგანიზებული და დაფინანსებული იყო ადგილობრივი მუნიციპალიტეტის მერიისა და " კერძო ბიზნესის"მხრიდან, დამკვეთებისგან,ცხადია,გაიცხრილა სიები და ვიღაცისთვის არასასურველი კანდიდატები სიიდან ამოღებული და ეს ბინძური საქმე განხორციელდა სწორედ არც მეტი, არც ნაკლები დაბა მესტიის საგანმანათლებლო რესურსცენტრის ხელმძღვანელის ხელით!", - წერს წულუკიძე.

ის ასევე აღნიშნავს, რომ პედაგოგების მიმართ ღირსების შემლახველი მოპყრობის წინააღმდეგ ბრძოლას გააგრძელებს.

ცნობისთვის, წულუკიძემ სოციალურ ქსელში პოსტი 21 ოქტომბერს გამოაქვეყნა. მისი თქმით, ის მასწავლებლის ეროვნული დღისადმი მიძღვნილ ღონისძიებაზე, დამსახურებული პედაგოგების სიიდან მისი კანდიდატურა პოლიტიკური მოტივით მოხსნეს.