ზუგდიდის შალვა დადიანის სახელობის პროფესიული სახელმწიფო დრამატული თეატრი სოციალურ ქსელში განცხადებას ავრცელებს და აღნიშნავს, რომ თეატრი მკაცრად გმობს პროტესტის მონაწილეების მიმართ ძალადობას.

"ჩვენი თეატრი მკაცრად გმობს ძალადობას მოქალაქეების მიმართ. სოლიდარობას ვუცხადებთ უკანონოდ დაკავებულ კოლეგებს და თანამემამულეებს.

ჩვენი სურვილია,რომ ჩვენი ხმა დარჩეს ადამიანის ღირსების, თავისუფლებისა და სამართლიანობის სასარგებლოდ.

ჩვენი თეატრი მუდამ მხარს დაუჭერს დემოკრატიულ პრინციპებსა და ადამიანის უფლებების დაცვას.
საქართველო ევროპაა! არა რუსეთს", - ვკითხულობთ მათ მიერ გავრცელებულ განცხადებაში.

ცნობისთვის, ზუგდიდში, უწყვეტი პროტესტის მე-11 დღეს, სახელმწიფო რწმუნებულის ადმინისტრაციის წინ, 17:00 საათზე მოქალაქეები კიდევ ერთხელ გააპროტესტებენ ევროკავშირთან მოლაპარაკებების გახსნის 2028 წლამდე შეჩერებას.

მოქალაქეების ნაწილი უკვე მე-11 დღეა, ხალხმრავალ დემონსტრაციებს მართავს საქართველოს სხვადასხვა ქალაქში. მათი თქმით, ქვეყანაში მიმდინარე პროცესები საქართველოს სახელმწიფოებრიობის შენარჩუნებასა და კონსტიტუციის 78-ე მუხლის დარღვევას ეხება, რომელიც ხელისუფლებას ევროპულ და ევროატლანტიკურ სტრუქტურებში საქართველოს სრული ინტეგრაციის უზრუნველსაყოფად ყველა ზომის მიღებას ავალდებულებს. თბილისში, შინაგან საქმეთა სამინისტროს დანაყოფები რუსთაველის გამზირზე მიმდინარე პროევროპულ აქციას მერამდენე დღეა, ძალის გამოყენებით შლის. პროფესიული მოვალეობის შესრულებისას, სპეცრაზმმა ფიზიკურად იძალადა ჟურნალისტებზე და ოპერატორებზე. დაშავებულებს შორის არიან სამოქალაქო აქტივისტები, მოქალაქეები და პოლიტიკოსები.

7 დეკემბერს, ტელეკომპანია "ტვ პირველის" გადამღებ ჯგუფს პირდაპირ ეთერში ნიღბიანი პირები დაესხნენ თავს. დაშავებულია ჟურნალისტი მაკა ჩიხლაძე და ოპერატორი გიორგი შეწირული.