პროტესტის 42 - ე დღეს ზუგდიდში მორიგი აქცია გაიმართა. სახელმწიფო რწმუნებულის ადმინისტრაციის შენობის წინ მოქალაქეები ისევ შეიკრიბნენ უცვლელი მოთხოვნით, გათავისუფლდნენ რეჟიმის პატიმრები და ჩატარდეს ხელახალი, სამართლიანი არჩევნები.

აქციის დაწყებამდე ცნობილი გახდა, ქვეყნის მე- 5 პრეზიდენტი, სალომე ზურაბიშვილი, 11 იანვარს შეუერთდება ზუგდიდში დაგეგმილ აქციას. ამის შესახებ სამოქალაქო სოლიდარობის ფონდმა გაავრცელა ინფორმაცია, რომელიც აქციის ორგანიზატორებმა პროტესტის მონაწილეებს სიტყვით გამოსვლისას გააცნეს.

"ქვეყანაში მიმდინარე პროცესებში პრეზიდენტმა საზოგადოების გამაერთიანებლის ფუნქცია იკისრა და მისი რეგიონული ტურნე რომ ზუგდიდიდან იწყება ნიშნავს იმას, რომ ჩვენი ბრძოლა ღირებული და მნიშვნელოვანია", - განაცხადეს აქციის ორგანიზატორებმა.

სიტყვით გამომსვლელების დაწყებამდე აქციაზე თავსაბურავის ე.წ. ბალაკლავას ტარებისთვის "დროას" აქტივისტი მარიამ სიჭინავა მეოთხედ დააჯარიმეს, ხოლო კერენ ესებუა, რომელმაც, მის მხარდასაჭერად დემონსტრაციულად დაიხურა ბალაკლავა, მეორედ დააჯარიმეს.

"მარიამის დაჯარიმების ფაქტს შევესწარი და ბუნებრივია, ძალიან გავბრაზდი. მეოთხეჯერ ხდება მარიამის დაჯარიმება, ბალაკლავის ტარების გამო. თანაც იდენტიფიცირების არანაირი პრობლემა არ აქვთ. მიმართავენ სახელით და გვარით და მოითხოვენ, მოიხსნას ბალაკლავა... როგორც კი მიეცათ საშუალება, რომ საკუთარი ძალაუფლება პერვერტულად გამოიყენონ, როგორც კი კანონი შემოვიდა, რომლის საშუალებითაც, ჩვენზე ზეწოლა შეუძლიათ, ყოველდღიურად აპირებენ ამის კეთებას და განმეორებას... ცხადია, არანაირი ჯარიმის გადახდას და არ ვაპირებთ ამ სისტემის გამყარებას საკუთარი ფულით", - უთხრა რადიო "ათინათს" სამოქალაქო აქტივისტმა.

მსგავსად წინა დღეებისა, მოქალაქეები აქციაზე ევროკავშირისა და საქართველოს დროშებით მივიდნენ. ისინი მიიჩნევენ, რომ საქართველოს ევროპული მომავალი და ევროატლანტიკურ სივრცეში ქვეყნის სრულფასოვანი ინტეგრაცია მოსახლეობის უმრავლესობის ისტორიული არჩევანია, ამ გზიდან გადახვევა კი სახელმწიფოს ღალატია. ისინი მიუთითებენ საქართველოს კონსტიტუციის 78-ე მუხლზე, რომელიც ხელისუფლებას ევროპულ და ევროატლანტიკურ სტრუქტურებში ქვეყნის გაწევრიანებისთვის ყველა ზომის მიღებას ავალდებულებს.

28 ნოემბერს ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს. ამ დღიდან საქართველოს სხვადასხვა ქალაქში უწყვეტი პროევროპული საპროტესტო აქციები იმართება. ზუგდიდში მოქალაქეების ნაწილი 28 ნოემბრიდან აპროტესტებს "ქართული ოცნების" გადაწყვეტილებას.