საქართველოს სახალხო დამცველის აპარატი ზუგდიდის საკრებულოს ფრაქცია "ქართული ოცნების" თავმჯდომარის მოადგილის, თაზო ფაცაციას მიერ შშმ პირისთვის გაგზავნილი ხმოვანი ჩანაწერის ფაქტს იკვლევს. ამის შესახებ რადიო "ათინათს" ომბუდსმენის აპარატის პრესსამსახურში განუცხადეს.

მათი თქმით, ამ ეტაპზე, გამოძიების ინტერესებიდან გამომდინარე, საქმის დეტალებზე ვერ ისაუბრებენ, თუმცა, აღნიშნავენ, რომ ფაქტს აუცილებლად მოჰყვება რეაგირება.

კერძოდ, საუბარია თაზო ფაცაციას მიერ აქციების მონაწილე შშმ პირისთვის გაგზავნილ აუდიო შეტყობინებაზე, რომელშიც ის ეუბნება "ბ....ი, დაანებე შენ გათხოვილი კაცების აქციაზე სიარულს თავი. დაანებე თავი, თორემ ტაძარშიც არ მიგიშვებენ მოძღვრები მერე".

ჩვენ კომენტარისთვის დავუკავშირდით ფაცაციას. გვაინტერესებდა ჰომოფობიური ლექსიკისა და შშმ პირზე შესაძლო მუქარის შემცველი ხმოვანი შეტყობინების ნამდვილობა, რაც მან დაადასტურა. თუმცა, თქვა რომ გასაჯაროებული ჩანაწერი კონტექსტიდან ამოგლეჯილია და ომბუდსმენის აპარატს სრულ აუდიო ჩანაწერებს გადასცემს.

" მე და ბ.... ბავშვობიდან ვიცნობთ ერთმანეთს. ის სამი თვეა, მიგზავნის ჩანაწერებს, გინებას, ლანძღვას. მისი ასეთ საქციელს პროვოცირება გაუკეთა ვიღაცამ და გამოიყენა ეს ყველაფერი სათავისოდ. ამის საშუალებას მე არავის არ მივცემ...ჩანაწერებში არაქრისტიანულად იქცეოდა და მაგის გამო გავუგზავნე. მასთან ერთად კიდევ ისმის ვიღაცების ხმა. ისინი ეჩურჩულებიან, რა უნდა გამოაგზავნოს. აუცილებლად გადავცემ ამ ყველაფერს სახალხო დამცველს. იქ რომ ხმები ისმის, მაინტერესებს, ომბუდსმენი თუ დაადგენს",- თქვა მან.

თავდაპირველად, ხმოვანი ჩანაწერი ზუგდიდის საკრებულოს ფრაქცია "ახალის" წევრმა მაია კალანდიამ საკუთარ ფეისბუქ გვერდზე გაავრცელა. მისი განმარტებით, შშმ პირმა მას ადრეც უთხრა, რომ ემუქრებოდნენ, თუმცა არ დაუჯერა. რამდენიმე დღის წინ, კი ფაცაციას მიერ გაგზავნილი შეტყობინება გაუზიარა კალანდიას.

ფაქტს სოციალურ ქსელში ეხმიანება "სამოქალაქო სოლიდარობის ფონდი". მათი თქმით, ჩანაწერში იკვეთება სიძულვილის ენა, შესაძლო ზეწოლა და ფარული მუქარის ელემენტები.