ზუგდიდში, გამსახურდიას #1-ში, დადიანების სასახლის ეზოში მდებარე მიწის ნაკვეთი, რომელიც 2020 წელს "ლაზეთი გრუპის" საკუთრებაში გადავიდა, მუნიციპალიტეტს გადაეცა. ამის შესახებ ინფორმაცია ზუგდიდის მუნიციპალიტეტის მერიამ გამოაქვეყნა.

მათი თქმით, ზუგდიდის მერიასა და შპს "ლაზეთი გრუპს" შორის მიმდინარე მოლაპარაკებები წარმატებით დასრულდა და მეპატრონის გადაწყვეტილებით, ყოფილი ამფითეატრის ტერიტორია კვლავ ქალაქის საკუთრებაა.

995 კვ.მ. მიწის ნაკვეთის გასხვისების შესახებ ინფორმაცია 2013 წელს გავრცელდა. როგორც მაშინ გაირკვა, ის "ერთიანი ნაციონალური მოძრაობის" წევრზე, ლევან ქარდავაზე 2007 წელს გაფორმდა. ეკონომიკის სამინისტრომ უძრავი ქონება 135 ათას დოლარად გაასხვისა. 2013 წელს, ქარდავამ რადიო "ათინათს" უთხრა, რომ ტერიტორიის შეძენა, ინვესტიციის ჩადება და იქ სასტუმროს აშენება "ენმ"-ის ხელისუფლების წარმომადგენლებმა სთხოვეს, თუმცა, მისივე თქმით, ის თანახმა იყო ტერიტორია გადახდილი თანხის უკან დაბრუნების სანაცვლოდ კვლავ სახელმწიფოსთვის დაებრუნებინა.

მოგვიანებით, ყოფილი "ამფითეატრის" ტერიტორია აუქციონზე მოქალაქე გია უბირიამ შეიძინა. საჯარო რეესტრში ატვირთული დოკუმენტაციის მიხედვით, უძრავი ქონება აუქციონზე აღსრულების ეროვნულმა ბიურომ გაიტანა. მისი საწყისი ფასი კი 482 250 ლარი იყო.

ზუგდიდში, აღნიშნული მიწის ნაკვეთის გასხვისება არაერთხელ გააპროტესტეს. აქციის მონაწილეები ისტორიული ეზოს გაყიდვის საქმის დაუყოვნებლივ გამოძიებას ითხოვდნენ.

ფოტო: ზუგდიდის მუნიციპალიტეტის მერია

ამავე თემაზე:

დადიანების მუზეუმის მიმდებარედ მიწის ნაკვეთი 413 000 ლარად გაიყიდა

ლევან ქარდავა: მუზეუმის ეზოს მიმდებარედ დადიანების კიევის სასახლის ასლი სასტუმრო უნდა ამეშენებინა

ზუგდიდში დადიანების სასახლის ეზოს გაყიდვა გააპროტესტეს (ვიდეო)

დადიანების სასახლის ეზოს გაყიდული ნაწილი კვლავ უფუნქციოდაა

აღსრულების ეროვნული ბიურო დადიანების ეზოში მიწის ნაკვეთის ნაწილს ყიდის