გაეროს ადამიანის უფლებების საკითხებში უმაღლესი კომისრის ოფისი განცხადებას ავრცელებს, რომელშიც აღნიშნავს, რომ აქციებზე უკანონოდ დაკავებული პირები უნდა გათავისუფლდეს და მოუწოდებს შესაბამის უწყებებს, დემონსტრაციების დროს პოლიციის მიერ ძალის გამოყენება გამოიძიონ.

"ჩვენ მივიღეთ ცნობები სამართალდამცავი ორგანოების წარმომადგენლების, ასევე უნიფორმის ან საიდენტიფიკაციო ნიშნების არმქონე პირების მხრიდან მშვიდობიანი დემონსტრანტების, ადამიანის უფლებათა დამცველებისა და ჟურნალისტების წინააღმდეგ განხორციელებული განზრახ ფიზიკური ძალადობის, მუქარის, დაშინებისა და შურისძიების შესახებ საქართველოში", - აცხადებს ექვსი დამოუკიდებელი ექსპერტი.

მათივე განმარტებით, ამ ბრალდებების მასშტაბი, როგორც დემონსტრანტებისთვის, ასევე, შემდგომში დაკავებული პირებისთვის მიყენებული ზიანის სიმძიმე, შესაძლოა, წარმოადგენდეს წამებას და სხვა სასტიკ, არაადამიანურ ან ღირსების შემლახავ მოპყრობას ან დასჯას.

"მიღებული ინფორმაცია მიუთითებს, რომ ეს ინციდენტები შესაძლოა არ ყოფილიყო იზოლირებული და მიანიშნებს მეთაურების პასუხისმგებლობაზე

არსებობს სარწმუნო ცნობები, რომ პოლიციამ გამოიყენა რეზინის ტყვიები, წყლის ჭავლი, ცრემლსადენი გაზი და სხვა ქიმიური გამაღიზიანებლები განურჩევლად დემონსტრანტების წინააღმდეგ. ცნობების თანახმად, ასობით ადამიანი დაშავდა, რომელთა შორის უჩვეულოდ მაღალი იყო თავისა და სახის მძიმე დაზიანებების წილი", - დასძენენ ისინი.

როგორც განცხადებაშია აღნიშნული, დამოუკიდებელმა ექსპერტებმა მიიღეს "შემაშფოთებელი ინფორმაცია, რომ ბევრ დაკავებულს მიაყენეს შეურაცხყოფა, იყო ფიზიკური ძალადობის ფაქტები, მათ ემუქრებოდნენ გაუპატიურებით ან სხეულის ნაწილების დამტვრევით და უარს ეუბნებოდნენ სამედიცინო დახმარებაზე".

ამ მოვლენების სიმძიმის გათვალისწინებით, ექსპერტები აღნიშნავენ, რომ საქართველოს ოფიციალური პირებისგან დამოუკიდებელი, მიუკერძოებელი, გამჭვირვალე და ეფექტიანი გამოძიების დაწყებას მოელიან, რომელიც საერთაშორისო სტანდარტებთან იქნება შესაბამისი. მათი თქმით, ყველა უკანონოდ დაკავებული უნდა გათავისუფლდეს და სამედიცინო დახმარება უნდა მიეწოდოთ მათ, ვინც ამას საჭიროებს.