ზუგდიდის რაიონულ სასამართლოში პარტია "დროას" წარმომადგენლისა და სამოქალაქო აქტივისტის მარიამ სიჭინავას მორიგი პროცესი გაიმართა. მოსამართლემ ნინო ჭაბუკიანმა ის სამართალდამრღვევად ცნო და ადმინისტრაციულ სახდელად 2000 ლარი დააკისრა.

ამჯერად, მას ბრალდების მხარე, რამდენიმე დღის წინ, ზუგდიდში მიმდინარე აქციაზე საბავშვო ნიღბით მისვლას ედავება, რაც, მიხეილ ყაველაშვილის მიერ ხელმოწერილი კანონის მიხედვით, შეკრების ან მანიფესტაციის ორგანიზებისა და ჩატარების წესის დარღვევად ითვლება.

სიჭინავა სასამართლო პროცესს არ ესწრებოდა. მან რადიო "ათინათს" უთხრა, რომ კანონმდებლობაში შეტანილი ერთ-ერთი ცვლილება სასამართლოში ბრალდებულის იძულების წესით მიყვანაა, რაც მან, პროცესზე გამოუცხადებლობით გააპროტესტა.

"ყაველაშვილმა, გარდა ბალაკლავას ტარებისა და პიროტექნიკის გამოყენებისა, მოაწერა კანონს ხელი, რომელიც ითვალისწინებს სასამართლოზე ბრალდებულის იძულების წესით მიყვანას. შემდეგი გამოწვევა სასამართლოსთვის იქნება ის, რომ პროცესზე მიმიყვანონ იძულების წესით", - თქვა მან.

აქტივისტის თქმით, ის ჯარიმების გადახდას არ აპირებს.

ცნობისთვის, ზუგდიდში, პროევროპულ აქციებზე ე.წ ბალაკლავას ტარებისთვის, სიჭინავა არაერთხელ დააჯარიმეს. ამასთან, ის ორჯერ დააკავეს. მას გამოძიება, ორივე შემთხვევაში, ადმინისტრაციულ სამართალდარღვევათა კოდექსის 174-ე მუხლის მე-5 ნაწილის, ანუ შეკრების ან მანიფესტაციის ორგანიზებისა და ჩატარების წესის დარღვევას ედავებოდა. სასამართლომ მას ადმინისტრაციულ პასუხისმგებლობად 5000-5000 ლარი დააკისრა.

27 იანვარს, პროტესტის ნიშნად, "დროას" წარმომადგენელი სასამართლო პროცესზე ბიძინა ივანიშვილის გამოსახულებიანი ნიღბით მივიდა და ამ ფორმით, კიდევ ერთხელ გამოუცხადა დაუმორჩილებლობა კანონს, რომელიც მანიფესტაციისას ნიღბის გამოყენებას კრძალავს.

გარდა ამისა, ზუგდიდში უწყვეტ აქციებზე ე.წ ბალაკლავას ტარებისთვის 2000-2000 ლარით დაჯარიმებულია აქტივისტები კერენ ესებუა და ცაბუნია ვართაგავა. 16 იანვარს, ესებუა ფეიერვერკის გასროლის გამო დააკავეს და 18 იანვარს 5000 ლარის ოდენობის ჯარიმით გაათავისუფლეს.