აფხაზეთის დე ფაქტო რესპუბლიკის ცენტრალურმა საარჩევნო კომისიამ 15 თებერვალს ჩატარებული რიგგარეშე საპრეზიდენტო არჩევნების წინასწარი შედეგები გამოაქვეყნა, რომელთა თანახმად, ხმები ასე გადანაწილდა:
- ბადრა გუნბა - 46,38%
- ადგურ არძინბა - 36,92%
- რობერტ არშბამ - 7,54%
- ოლეგ ბარციცი - 4,04%
- ადგურ ხურხუმალი – 0,97%.

ამავე მონაცემებით, ამომრჩეველთა აქტივობამ 69% შეადგინა, კენჭისყრაში თითქმის 99 ათასი ადამიანი მონაწილეობდა.

ოკუპირებული აფხაზეთის ფარგლებს გარეთ საარჩევნო უბნები რუსეთის ორ ქალაქში (მოსკოვსა და ჩერქესკში) იყო გახსნილი.

არჩევნების წინა დღეს თურქეთის ქალაქ საკარიაში, სადაც აფხაზური დიასპორის მნიშვნელოვანი ნაწილი ცხოვრობს, საარჩევნო უბანი დაიხურა.
„საპრეზიდენტო“ არჩევნების მეორე ტურში, რომელიც 1 მარტს გაიმართება, მონაწილეობას ორი კანდიდატი მიიღებს, ასლან ბჟანიას თანაგუნდელი - ბადრა გუნბა და აფხაზი ოპოზიციონერი, ადგურ არძინბა.

ვადამდელი „საპრეზიდენტო“ არჩევნები, აფხაზეთში, გუშინ, 15 თებერვალს გაიამრთა. 

ცნობისთვის, ყოფილი “პრეზიდენტი” ასლან ბჟანია თანამდებობიდან 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.