აფხაზეთის თვითგამოცხადებული რესპუბლიკის ე.წ. ცენტრალური საარჩევნო კომისიის თავმჯდომარემ დიმიტრი მარშანმა კენჭისყრის წინასწარი შედეგები გამოაცხადა.
მისი მონაცემებით, არჩევნების მეორე ტურში ბადრა გუნბამ გაიმარჯვა. მან ხმების 54,73% მიიღო, ადგურ არძინბამ ხმების 41,54% დააგროვა.

შეგახსენებთ, რომ 1 მარტს ოკუპირებულ აფხაზეთში "საპრეზიდენტო" არჩევნების განმეორებითი კენჭისყრა გაიმართა. 

„პრეზიდენტობისთვის“ ორი კანდიდატი იბრძოდა, ბადრა გუნბა, რომელსაც მოსკოვი ღიად უჭერდა მხარს და აფხაზი ოპოზიციონერი ადგურ არძინბა.  არჩევნების პირველ ტურში, რომელიც 2025 წლის 15 თებერვალს ჩატარდა, მათ  ამომრჩეველთა ყველაზე მეტი ხმა მიიღეს. 

ადგურ არძინბას შტაბმა გაავრცელა ინფორმაცია, რომელშიც „აფხაზეთის სხვადასხვა რეგიონში არჩევნების დროს გამოვლენილი საარჩევნო კანონმდებლობის მასიური დარღვევებზეა" საუბარი. 

1 მარტს, საღამოს გავრცელდა ინფორმაცია, რომ გაგრის რაიონში, ერთ - ერთ საარჩევნო უბანზე, სროლა იყო.

რუსეთის საგამოძიებო კომიტეტმა აფხაზეთში სროლასთან დაკავშირებით, „ტერორიზმის“ მუხლით საქმე აღძრა.

სახელმწიფო მინისტრის აპარატი ეხმიანება ოკუპირებული აფხაზეთის რეგიონში უკანონოდ გამართულ ე.წ. „საპრეზიდენტო არჩევნების მეორე ტურს", რომელიც ეწინააღმდეგება საერთაშორისო სამართლის ფუნდამენტურ პრინციპებს და საქართველოს სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობის მორიგ უხეშ დარღვევას წარმოადგენს. ამის შესახებ უწყებამ საკუთარ ვებ გვერდზე განცხადება გაავრცელა.

უკრაინის საგარეო უწყებამ გაავრცელა გუშინ განცხადება, რომელშიც ნათქვამია, რომ უკრაინა გმობს და არ აღიარებს "საპრეზიდენტო" არჩევნებს ოკუპირებულ აფხაზეთში