პროევროპული პროტესტის 124-ე დღეს დემონსტრანტები 19:00 საათიდან კვლავ სახელმწიფო რწმუნებულის ადმინისტრაციის შენობასთან შეიკრიბნენ.

დღევანდელი აქცია, სიმბოლურად, 1991 წლის 31 მარტის ისტორიულ რეფერენდუმს მიეძღვნა.

აქციის მონაწილეებს საპროტესტო შინაარსის ბანერები ეჭირათ, წარწერებით: ცვლილებების დროა, ერთად დავიცვათ სიმართლე, დადექი ისტორიის სწორ მხარეს, ანწუხელიძე უკვდავია და ა.შ.

მომიტინგეებმა სიტყვით გამოსვლისას მიმოიხილეს ისტორიული მოვლენები, რომლებმაც მნიშვნელოვანი წვლილი შეიტანეს საქართველოს დამოუკიდებლობის აღდგენის პროცესში, გაიხსენეს ეროვნულ-განმათავისუფლებელი მოძრაობის ლიდერები, მათ შორის ზვიად გამსახურდია და მერაბ კოსტავა. ამასთან, გააჟღერეს პროტესტის მთავარი მოთხოვნაც, რომელიც უცვლელი რჩება - გათავისუფლდეს რეჟიმის პოლიტპატიმრები და დაინიშნოს ხელახალი, სამართლიანი არჩევნები.

სიტყვით გამოსვლების დასრულების შემდეგ, მოქალაქეებმა სამხარეო ადმინისტრაციის შენობიდან ცენტრალური ბულვარის მიმართულებით მსვლელობა მოაწყვეს და სკანდირებდნენ - „არ დავთმობთ დამოუკიდებლობას“, თავისუფლება სინდისის პატიმრებს“, „ვითხოვთ ახალ არჩევნებს“.

შეგახსენებთ, 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს. ამ დღიდან საქართველოს სხვადასხვა ქალაქში პერმანენტული პროევროპული საპროტესტო აქციები იმართება. მოქალაქეები ამბობენ, რომ საქართველოს ევროპული მომავალი და ევროატლანტიკურ სივრცეში ქვეყნის სრულფასოვანი ინტეგრაცია მოსახლეობის უმრავლესობის ისტორიული არჩევანია.