სოჭიდან აფხაზეთის მიმართულებით რეგულარული საზღვაო სამგზავრო მიმოსვლის შესაძლებლობას განიხილავენ მოსკოვში. ამის შესახებ ტრანსპორტის მინისტრმა რომან სტაროვოიტმა ტელეკომპანია Russia 24-თან ინტერვიუში განაცხადა.

"ჩვენ ვგეგმავთ სოჭის მიმართულებას, არის აფხაზეთში შესვლის ვარიანტები, ეს უკვე საერთაშორისო მიმოსვლაა. პრინციპში, ვთვლი, რომ ეს ნამდვილად საინტერესო იქნება რუსებისთვის", - განაცხადა რუსმა მინისტრმა.

მან ასევე აღნიშნა, რომ ბიზნესი მზად არის ხაზებზე გავიდეს, თუმცა, აუცილებელია მგზავრთა ნაკადის და პროექტის ეკონომიკის გამოთვლა.

”მეწარმეები მზად არიან ამის გასაკეთებლად, გემები უკვე მზადაა, მაგრამ ჩვენ უნდა გამოვთვალოთ მგზავრთა ნაკადები ქალაქ სოჭთან ერთად, რადგან საზღვაო გადაზიდვებმა, მინიმუმ, ხარჯები მაინც უნდა აანაზღაუროს”, - განმარტა მან.

სტაროვოიტოვის თქმით, ასეთი მარშრუტების ორგანიზება სოჭის ადმინისტრაციის კომპეტენციაში შედის, მაგრამ ტრანსპორტის სამინისტრო მზად არის ყველანაირად მხარი დაუჭიროს ამ პროექტს.

2025 წლის ნავიგაციის სეზონზე აფხაზეთთან რეგულარული საზღვაო მიმოსვლის აღდგენა რუსეთის ტრანსპორტის სამინისტრომ ადრეც დააანონსა.

ამავე ცნობით, გასულ წელს სოჭი-ანაპა-სოჭის მარშრუტზე მგზავრთა ანალოგიურ გადაყვანაზე მაღალი მოთხოვნა დაფიქსირდა. გემმა „იალტამ“ 5000-ზე მეტი ადამიანი გადაიყვანა ივნის - ივლისში, ხოლო მაის - ოქტომებრში, დაახლოებით 30 000 მგზავრმა ისარგებლა თბომავალ „სევასტოპოლით“, ნოვოროსიისკი - გელენჯიკი - სოჭის ხაზზე.

2023 წელს, რუსეთის მიერ ანექსირებულმა ყირიმმა ოკუპირებულ აფხაზეთს, სოჭი-სოხუმის მარშრუტზე კომეტის ტიპის სამგზავრო კატამარანების ჩაშვება შესთავაზა, "რესპუბლიკაში ტურისტების ნაკადი გასაზრდელად".

2023 წლის ივნისში, სოხუმის ნავსადგურში რუსული საკრუიზო ლაინერი "კნიაზ ვლადიმირი" შევიდა. მედია წერდა, რომ სოხუმსა და სოჭს შორის საკრუიზო სერვისზე შეთანხმება, ჯერ კიდევ 2018 წელს შედგა.