ზუგდიდისა და ცაიშის მიტროპოლიტი, საქართველოს საპატრიარქოს საგარეო ურთიერთობის განყოფილების თავმჯდომარე მეუფე გერასიმე, "ქართული ოცნების მიერ" პრეზიდენტად არჩეულ მიხეილ ყაველაშვილთან ერთად, ვატიკანში რომის პაპის, ფრანცისკეს დაკრძალვის ცერემონიას დაესწრება. ამის შესახებ ინფორმაცია საქართველოს პრეზიდენტის ადმინისტრაციამ გაავრცელა.

პრესსამსახურის ინფორმაციით, დელეგაციის შემადგენლობაში ასევე იქნებიან „ქართული ოცნების“ მთავრობის საგარეო საქმეთა მინისტრი მაკა ბოჭორიშვილი, პრეზიდენტის ადმინისტრაციის უფროსი ქეთევან კვინიკაძე, ასევე, თბილისის სასულიერო აკადემიისა და სემინარიის რექტორი, სიონის საკათედრო ტაძრის წინამძღვრის მოადგილე, პროტოპრესვიტერი გიორგი ზვიადაძე.

რომის პაპი 21 აპრილს 88 წლის ასაკში გარდაიცვალა. მისი დაკრძალვის ცერემონია 26 აპრილს გაიმართება. ვატიკანის ცნობით, პაპ ფრანცისკეს სანტა მარია მაჯორეს ბაზილიკაში დაკრძალავენ. ის 23 აპრილს წმინდა პეტრეს ბაზილიკაში დაასვენეს.