ვეტერანები დეპარტამენტის თავმჯდომარის ირაკლი შიხიაშვილის გადადგომას ითხოვენ და მას ამისთვის 10-დღიან ვადას აძლევენ.

განცხადება ამის შესახებ "მებრძოლ პატრიოტთა კავშირის" თავმჯდომარე ემზარ ქვარიანმა და ლაგოდეხის სამხედრო პოლიციის ყოფილმა უფროსმა ტარიელ პაქსაშვილმა გააკეთეს.

ქვარიანის განცხადებით, ირაკლი შიხიაშვილი ვეტერანებს შორის დაპირისპირებას უწყობს ხელს და მათ ნაწილს ანტისახელმწიფოებრივი ძალების მხარდაჭერაში ადანაშაულებს.

"მოვითხოვთ განხორციელდეს ომის ვეტერანთა სოციალური რეაბილიტაცია, გაიზარდოს საარსებო მინიმუმამდე 22 ლარიანი საყოფაცხოვრებო სუბსიდია და მისი გაცემა მოხდეს ყველა ვეტერანზე, ასევე შეწყდეს ასაკობრივი დისკრიმინაცია და განხორციელდეს ვეტერანთა ინტეგრაცია საზოგადოებაში",- განაცხადა ემზარ ქვარიანმა.

ვეტერანმა ემზარ ქვარიანმა შიხიაშვილის ის განცხადებაც გააპროტესტა, სადაც ის აცხადებს, რომ ვეტერანების ერთი ნაწილი უკრაინიდან იმართება.

ვეტერანების ერთ-ერთი მთავარი მოთხოვნაა, ასევე მოხდეს ჰოსპიტალის დაფინანსების აღდგენა და მისი ხელშეუხებლობის კანონით განსაზღვრა.