ზუგდიდში, დემოკრატიული ჩართულობის ცენტრში ქალაქ ზუგდიდის მუნიციპალიტეტის 2014 წლის ბიუჯეტის შესრულების ანგარიშის  განხილვა გაიმართა. ბიუჯეტის ანგარიში საკრებულოს საფინანსო კომისიის თავმჯდომარემ კახაბერ ფარცვანიამ წარადგინა. შეხვედრას საჯარო მოხელეები, არასამთავრობო ორგანიზაციისა და მედიის წარმომადგენლები დაესწრნენ. კახა ფარცვანიას თქმით, ქალაქ ზუგდიდის მუნიციპალიტეტის ბიუჯეტის შემოსავლების ნაწილი თითქმის, ხოლო ხარჯვითი ნაწილი -92, 2 % -ით შესრულდა. ფარცვანიამ შეხვედრაზე ასევე აღნიშნა, რომ ბიუჯეტის  სოციალურ მუხლში არასამთავრობო ორგანიზაციების პროექტების თანადაფინანსებისთვის გათვალისწინებული თანხის ნაშთმა 20 ათასი ლარი შეადგინა, რასაც  არასამთავრობოების მხრიდან შეკითხვები მოჰყვა. "ამ მუხლში ნაშთი რომ დარჩა, ამაში ლომის წვლილი ჩვენ მიგვიძღვის.  არ მოხდა არასამთავრობოების სათანადო ინფორმირება და შესაბამისად, საკრებულოში პროექტები არ შემოვიდა", - აღნიშნა შეხვედრაზე ფარცვანიამ. დემოკრატიული ჩართულობის ცენტრის კოორდინატორმა ეკა მინჯორაიამ საფინანსო კომისიის თავმჯდომარეს ჰკითხა: თუ რა მექანიზმები ხორციელდება დღეს იმისთვის, რომ არ განმეორდეს იგივე.  მისი თქმით, არასამთავრობოების უდიდესი ნაწილი ამ მუხლის შესახებ დღესაც არ ფლობს ინფორმაციას. ჩართულობის ცენტრის კოორდინატორს კახა ფარცვანიამ უპასუხა, რომ დღეს ამის საშიშროება არ დგას, რადგან საკრებულოში ამ პერიოდისთვის უამრავი პროექტია შესული.