წალენჯიხის მუნიციპალიტეტში სტიქიის შედეგად მიყენებული ზარალის ოდენობა უკვე ცნობილია. სტიქიურ მოვლენებთან დაკავშირებით შექმნილი კომისიის ინფორმაციით, ზარალმა 1 მილ 400 ათასი ლარს მიაღწია. საქართველოს რეგიონალური განვითარებისა და ინფრასტრუქტურის სამინისტროს დეპარტამენტის უფროსმა ნოდარ მიქიაშვილმა, წალენჯიხის მუნიციპალიტეტის ხელმძღვანელ პირებთან ერთად, სტიქიის შედეგად დაზიანებული ინფრასტრუქტურა მოინახულა და ადგილზე გაეცნო არსებულ ვითარებას. როგორც რადიო "ათინათს" წალენჯიხის მუნიციპალიტეტის გამგეობის პრესსამსახურმა ეკა ბელქანიამ განუცხადა,  ჯვარი-ჩქვალერის დამაკავშირებელ გზაზე აღდგენითი სამუშაოები მიმდინარეობს. მისივე განმარტებით " ჯვარი-ჩქვალერის გზაზე თავისუფლად  გადაადგილდება მსუბუქი და სასწრაფო დახმარების მანქანები. ცნობისთვის, 19 ივლისს, ძლიერი წვიმის შედეგად მოვარდნილმა ღვარცოფმა მნიშვნელოვნად დააზარალა წალენჯიხის მუნიციპალიტეტი. დაიტბორა გზები, ეზოები და საცხოვრებელი სახლები. რამოდენიმე ადგილზე ჩამოწვა მეწყერი, განადგურდა საკარმიდამო ნაკვეთები, ყანები და დაიხოცა შინაური ფრინველები. სტიქიის შედეგად განსაკუთრებით დაზიანდა საჩინოს, ობუჯის, ფახულანის, ჭალეს, მუჟავასა და ლიის თემების შიდა გზები, ასევე წყალდიდობის გამო მოიშალა გაბიონები და ხიდბოგირები. განსაკუთრებით დაზიანდა ჯვარი–ჩქვალერის სავალი გზის მონაკვეთი.