მულტიმედია
ზუგდიდელი მოზარდები ახალ რეალობაში - როგორ შეიცვალა მათი ცხოვრება და რა ენატრებათ პანდემიისას (ფოტო/ვიდეო)
კორონავირუსის პანდემიამ, წელიწადზე მეტია, მოზარდების უმრავლესობისთვის სწავლის პროცესი და ცხოვრების რიტმი რადიკალურად შეცვალა. 16 წლის ელენეს გული ყველაზე მეტად იმაზე სწყდება, რომ შეზღუდვების გამო ექსკურსია ვერ მოაწყვეს. ამბობს, რომ თანატოლებთან გართობა ისაა, რაც ახლა განსაკუთრებით ენატრება.

,,ექსკურსიებზე წასვლა მომენატრა ძალიან, იმის მიუხედავად, რომ ახლა კონტაქტურად ვართ, შეუძლებელია ექსკურსიებზე წასვლა და ძალიან გული მწყდება, კარგად ვერთობოდით ხოლმე და მენატრება ეგ პერიოდი’’, - ამბობს ელენე.

სწავლების ონლაინ რეჟიმს მალევე შეეჩვია, მეტიც, სხვადასხვა ახალი უნარიც გამოიმუშავა. მიიჩნევს, რომ მონდომების შემთხვევაში, ონლაინ სწავლების პირობებშიც შესაძლებელია კარგი განათლების მიღება.

„ისეთივე პროდუქტული გამოდგა ჩემთვის ონლაინ სწავლება, როგორიც კონტაქტური იყო. მასწავლა, რომ ყურადღებით უნდა მოუსმინო მასწავლებლებს, რომ არაფერი გამოგეპაროს“, - გვითხრა ელენე ადამიამ.

კლასებში დაბრუნების შემდეგ პირბადით ოთახში ყოფნა მისთვის სტრესული აღმოჩნდა, თუმცა, აცნობიერებს, რომ საკუთარი და გარშემომყოფების ჯანმრთელობისთვის რეგულაციების დაცვა აუცილებელია.

„ზოგადად კლასში ხშირად გვაქვს ესეთი შემთხვევა, რომ სუნთქვა უჭირთ ბავშვებს და ფანჯარას ვაღებთ ამის გამო. კომფორტული არ არის, რა თქმა უნდა, პირიქით, სტრესულია, მაგრამ აუცილებელია. ეს არა მარტო ის ფაქტორია, რომ საკუთარ თვს ვუფრთხილდებით და ჩვენს ჯანმრთელობას, არამედ ჩვენს გარშემომყოფებს. ჩემი აზრით, ძალიან მნიშვნელოვანია ამის გაცნობიერება’’.
პირველკლასელი ნიკოლოზ ძაძამია პირველ გაკვეთილს ონლაინ დაესწრო და მოეწონა კიდეც. თან ისიც იცოდა, თუ რატომ იყო საჭირო დისტანციური გაკვეთილი, იმისთვის, რომ როგორც თვითონ ამბობს, კორონავირუსი „მის ორგანიზმში არ შემოსულიყო“.

,,მენატრებოდა ჩემს მეგობრებთან თამაში. გასვლა არ შეიძლებოდა გარეთ იმიტომ, რომ კორონავირუსი ჩვენს ორგანიზმში არ შემოსულიყო. ონლაინ გაკვეთილები საინტერესო იყო, ვისწავლე ასოები, რიცხვები, ლექსები, ენის გასატეხები, თუმცა ხარვეზებიც იყო. ზოგჯერ მასწავლებელი არ იყო და უმასწავლებლოდ ვიყავით. მასწავლებელის ხმა არ ისმოდა, ხმა წყვეტილად მოდიოდა და ამის გამო ითიშებოდა კამერები’’, - გვიყვება ნიკოლოზი.
პანდემიის დროს ბებია-ბაბუასთან სოფელში ყოფნა და მეგობრებთან ეზოში თამაში მოენატრა. ამბობს, რომ თვითიზოლაციის დროს ბევრი ლექსი ისწავლა და იგავ-არაკები წაიკითხა.

ნიკოს დედა, ლორა ქობალია რადიო ,,ათინათთან’’ ჰყვება, რომ ონლაინ სწავლა გამოწვევებით სავსე აღმოჩნდა მათთვის, ამიტომ ცდილობდა, გაკვეთილების დროს შვილის გვერდით ყოფილიყო.

,,მე ვფიქრობ, რომ ყველაზე დიდი როლი დისტანციური სწავლების დროს მაინც მშობლებზე მოდიოდა იმიტომ, რომ იქ ინტერნეტის ხარვეზია, უზრუნველყოფილი და დაცული არასდროს არ ხარ. ზოგჯერ ხმა წყდებოდა, იყო ხმაური, რაც შეიძლება მასწავლებელმა ცოცხალ პროცესში უფრო დაარეგულიროს, მერე კლასი უფრო აიყოლიოს, თვალით კონტაქტი სხვა გავლენას ახდენს მოზარდებზე, მითუმეტეს პირველკლასელებზე. მერე გადმოდიოდა ჩვენზე პასუხისმგებლობა, როგორ კი ჩაივლიდა ეს დისტანციური გაკვეთილი, ბავშვები დამატებით ახსნას საჭიროებდნენ’’, - აღნიშნავს ლორა, თუმცა ამის მიუხედავად, ამბობს, რომ დისტანციური სწავლება მისი შვილისთვის საკმაოდ მიმზიდველი და საინტერესო აღმოჩნდა, რადგან ბავშვს დამოუკიდებლად მოქმედების, ახალი უნარ-ჩვევების გამომუშავების კარგი შესაძლებლობა მისცა.

როცა პანდემია დაიწყო, უჩვეულო ვითარებაში აღმოჩნდა 16 წლის მარიამ ვეკუა. გაუჭირდა შეგუება იმასთან, რომ რეალურმა ურთიერთობებმა ონლაინ ჩატებსა და ვიდეო ზარებში გადაინაცვლა.

,,ასე ვთქვათ, ცოტათი ხელიც ჩავიქნიე ონლაინ გაკვეთილებზე ალბათ, თუმცა როდესაც პირველ გაკვეთილს დავესწარი, შემდეგ მეორეს, მივხვდი, რომ ჩვენი სკოლის მასწავლებლები ყველაფერს აკეთებდნენ იმისთვის, რომ ჩვენთვის ისეთი გარემო შეექმნათ და ისეთი სიტუაცია, რომ თავი გვეგრძნო ისე, როგორც საკლასო ოთხებში და ჩემთვის სულაც არ იყო პრობლემა ,,თიმსში’’ ჯდომა , რადგან ვიღებდი ისეთ განათლებას, როგორსაც სკოლაში და შეიძლება უფრო მეტსაც კი’’, - ამბობს მარიამი.

ამბობს, რომ თავისუფალი დრო ახალი უნარების ასათვისებლად გამოიყენა და სხვადასხვა სოციალურ თუ საგანმანათლებლო პროექტში ჩაერთო.

,,ახლა 2020 წელს რომ ვიხსენებ, ცოტა ტკბილად მახსენდება, მიუხედავად ამდენი სირთულისა. ჩემს თავს არ მივეცი იმის უფლება რომ თავისუფალი დრო უქმად გამეტარებინა. ძალიან ბევრ სოციალურ და საგანმანათლებლო პროექტში ჩავერთე. დისტანციურ რეჟიმში ვმუშაობდი ყოველთვის. დავესწარი უამრავ ტრენინგს და ეს 2020 წელი და ეს თვითიზოლაცია დამეხმარა საკუთრი თავის რეალიზაციაში და განვითარებაში. საკუთარ თავში აღმოვაჩინე ისეთ უნარები, რაც აქამდე არ მეგონა, რომ მქონდა. არც ვიცოდი ამდენი რამის გაკეთება თუ შემეძლო. ახლა უკვე შემიძლია 2020 წელს მიღებული გამოცდილება მომდევნო წლებში განვავითარო და განვავრცო. ეს ძალიან მახარებს, მაგრამ გარემოსთნ კონტაქტი და ადამიანებთან შეხვედრა მომენატრა ყველაზე მეტად ’’, - გვეუბნება მარიამი.
ნინო ქობალია ზუგდიდის მეოთხე საჯარო სკოლაში, მე-10 კლასში სწავლობს. ამბობს, რომ პანდემიის პირველ ეტაპზე ონლაინ სწავლებით უკმაყოფილო იყო, გარკვეული დროის შემდეგ კი სკოლაში სიარული და სწავლა უფრო დააფასა. იძულებით სახლში ჩაკეტილმა ყოველდღიურობა წიგნებით გაიმრავალფეროვნა. ნინოს ყველაზე მეტად ქუჩაში თავისუფლად სიარული და მეგობრებთან გართობა მოენატრა.

,,როდესაც მიჩვეული ხარ აქტიურ ცხოვრებას და უეცრად გიწევს სახლში ჯდომა , ეს ძალიან რთულია შესაგუებლად და თავდაპირველად გამიჭირდა კიდეც. გენატრება თითქმის ყველაფერი, გარეთ გასვლა, ადმიანებთან კომუნიკაცია, კონტაქტი მეგობრებთან, მათთან შეხვედრა და ლაპარაკი. შესაგუებელი იყო ეს ყველაფერი, რაც უეცრად დაგვატყდა თავს. ონლაინ გაკვეთილები სიმართლე გითხრათ, არც თუ ისე მომწონდა, რადგან მერჩივნა საკლასო ოთხებში გაგრძელებულიყო სწავლა, მაგრამ ონლაინ გაკვეთილებმა მასწავლა ტექნოლოგიებთან ბევრად უკეთესად მუშაობა, ვიდრე ვიცოდი’’, - გვითხრა ნინომ.

ბავშვებმა და მოზარდებმა უკვე მეორე სასწავლო წელი დასრულეს პანდემიის პირობებში. ყველა, ვისაც რადიო „ათინათი“ ესაუბრა, აღნიშნავს, რომ კოვიდმა მათი რეალობა რადიკალურად შეცვალა. მიუხედავად იმისა, რომ პანდემიის ჩაკეტილობასა და დისტანციურ სწავლებამ თავისი დადებითი მხარეებიც აღმოაჩნდა, ჩვენი რესპონდენტები თანხმდებიან იმაზეც, რომ მთავარი, რაც ამ პერიოდმა მათ წაართვა, ადამიანებთან ცოცხალი ურთიერთობაა.




Print Email
FaceBook Twitter
რ ე კ ლ ა მ ა
სამეგრელოს თხილის პლანტაციებში აზიური ფაროსანას პოპულაციამ გამრავლება დაიწყო. ამასთან, შეინიშნება სხვადასხვა დაავადების, მათ შორის, ბაქტერიოზისა და ნაცრის გავრცელება.
ზუგდიდის მუნიციპალიტეტის მერის მოვალეობის შემსრულებელმა კონსტანტინე კაკავამ და საკრებულოს თავმჯდომარე მამუკა წოწერიამ, ეგრისის ადმინისტრაციულ ერთეულში, ჩიქოვანის ქუჩაზე, მრავალბინიანი საცხოვრებელი სახლების ეზოების  კეთილმოწყობის სამუშაოები დაათვალიერეს.
ზუგდიდის მუნიციპალიტეტის მერიამ მიმდინარე წელს, სოციალურად დაუცველი ოჯახებისთვის საპილოტე პროგრამა, უფასო გაზიფიცირება ოჯახებს დაიწყო - ამის შესახებ ინფორმაციას ზუგდიდის მუნიციპალიტეტის მერია ავრცელებს.
კორონავირუსი
სოხუმმა კორონავირუსით ინფიცირების 103 ახალი შემთხვევა დაადასტურა. აფხაზეთის დე ფაქტო რესპუბლიკაში შექმნილი ოპერატიული შტაბის ინფორმაციით, Covid-19-ით
ამ დროისთვის, სამეგრელოს ხუთ კოვიდმიმღებ კლინიკაში 200-მდე პაციენტი მკურნალობს, მათგან 5-ის მდგომარეობა მძიმეა, საშუალო სიმძიმის - 40.
Stopcov.ge-ზე გამოქვეყნებული ინფორმაციის თანახმად, ბოლო 24 საათში გამოვლინდა ვირუსით ინფიცირების 811 ახალი დადასტურებული შემთხვევა, მათგან 50 სამეგრელო-ზემო სვანეთში დაფიქსირდა.
საზოგადოება
2015 წლის 13 ივნისს თბილისში მომხდარი ტრაგედიიდან  ექვსი წელი გავიდა. სტიქია მდინარე ვერეს ადიდებამ და ბეთანიის გზაზე წარმოქმნილმა მძლავრმა მეწყერმა გამოიწვია.
მართლმადიდებელი ეკლესია დღეს მაცხოვრის ამაღლებას ზეიმობს. დღესასწაულთან დაკავშირებით ტაძრებში სადღესასწაულო წირვა-ლოცვა აღსრულდება.
საქართველო, უკრაინა და კოსოვო პირველი სამი ევროპული ქვეყანაა, რომელიც კორონავირუსის საწინააღდეგო ვაქცინას შეერთებული შტატებისგან მიიღებს.
ამავე კატეგორიაში
დღის სიახლეები
16 / ივნისი 2021
2021 წლის მასწავლებლის ეროვნული ჯილდოს საუკეთესო ათეულში მესტიის სკოლის მასწავლებელიცაა.
16 / ივნისი 2021
სოხუმმა კორონავირუსით ინფიცირების 103 ახალი შემთხვევა დაადასტურა. აფხაზეთის დე ფაქტო რესპუბლიკაში შექმნილი ოპერატიული შტაბის ინფორმაციით, Covid-19-ით
16 / ივნისი 2021
სამეგრელოს თხილის პლანტაციებში აზიური ფაროსანას პოპულაციამ გამრავლება დაიწყო. ამასთან, შეინიშნება სხვადასხვა დაავადების, მათ შორის, ბაქტერიოზისა და ნაცრის გავრცელება.
მთავარი საინფორმაციო გამოშვება
არქივი
«« ივნისი 2021 »»
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1234
ამინდი
ზუგდიდი 21 °C
img
სოხუმი 22 °C
img
ფოთი 22 °C
img
მესტია 24 °C
img
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.