კოალიცია "ერთიანობა - ნაციონალური მოძრაობის" წევრისა და პარლამენტის დეპუტატის ანა წითლიწის ინფორმაციით, ზუგდიდში, ბარამიას ქუჩაზე, ე.წ დევნილთა დასახლებაში მისი პარტიის წარმომადგენლებს თავს დაესხნენ.

როგორც ის სოციალურ ქსელში წერს, შემთხვევა მაშინ მოხდა, როდესაც წინასაარჩევნოდ ადგილობრივებს ხვდებოდა. თავდამსხმელები კი, მისივე ცნობით, "ქართული ოცნების" აქტივისტები არიან.

"ესენი არიან ქართული ოცნების ზონდერების ნაწილი რომლებიც თავს დაგვესხნენ დღეს ბარამიას ჩასახლებაში. ესენი გვირტყამდნენ უმოწყალოდ. ამათი გაშიფვრა მარტივია თუ პოლიცია მოინდომებს.

შსს, ყველა მათგანის იდენტიფიცირება შესაძლებელი და მარტივია. აბა, თუ შეძლებთ.
ნაწილი გაშიფრული გვყავს. ვისაც გეცნობათ ეს ადამიანები დაგვეხმარეთ ამოცნობაში და მომწერეთ პირადში", - აღნიშნავს ის.

ზუგდიდის მუნიციპალიტეტის მერი მამუკა წოწერია "ქართული ოცნების" მიმართ გამოთქმულ ბრალდებას პასუხობს და ამბობს, რომ ენმ მშვიდ წინასაარჩევნო გარემოში ძალადობის შეტანას ცდილობს.

"ისინი დაუპირისპირდნენ მცირეწლოვან შვილთან მყოფ დევნილ დედას, რომელსაც პატარა ბავშვთან ერთად აყენებდნენ სიტყვიერ და ფიზიკურ შეურაცხყოფას. ის, რაც ენმ-მა ზუგდიდში ჩაიდინა, არის ყოვლად მიუღებელი ფაქტი. მოვუწოდებთ ყველა სადამკვირვებლო მისიას, შეისწავლონ მომხდარი, რომელიც მოწმობს ამომრჩევლის ზიზღს, განსხვავებული აზრის მიუღებლობას და ძალადობას", - განაცხადა მან.

შემთხვევა 19 სექტემბერს მოხდა. ადგილზე მობილიზებული იყო პოლიციის რამდენიმე ეკიპაჟი.


ფოტო: ანა წითლიძის ფეისბუქ გვერდი