აფხაზეთის დე ფაქტო რესპუბლიკის ენერგეტიკისა და ტრანსპორტის „მინისტრი“ ჯანსუხ ნანბა „უკანონოდ მიიჩნევს საარბიტრაჟო სასამართლოს გადაწყვეტილებას სახელმწიფო საკუთრებაში არსებული ელექტროგადამცემი ხაზის შპს სოხუმის ჰიდროელექტროსადგურისთვის გადაცემის შესახებ“. გამოცემა „აიაშარა“ წერს ამის შესახებ.

ამავე ცნობით, მანამდე, ე.წ. პრეზიდენტის მოვალეობის შემსრულებელმა, ვალერი ბგანბამ, „ენერგეტიკის სამინისტროს“ დაავალა, „გადაუდებელი ზომები მიიღოს იმ კანონების აღსასრულებლად, რომლებიც კრძალავს ენერგეტიკული ობიექტების, რომლებიც ექსკლუზიურად სახელმწიფო საკუთრებაა, კერძო საკუთრებაში გადაცემას“.

20 კმ-მდე სიგრძის და 110 კვტ სიმძლავრის ელექტროგადამცემი ხაზი, რომელიც კომპანია „ჩერნომორენერგოს“ ბალანსზე ირიცხებოდა კერძო საკუთრებაში გადაეცა შპს „სოხუმი ჰესს“. შესაბამისი გადაწყვეტილება, „საარბიტრაჟო სასამართლომ“ მიიღო.

აფხაზური მედიის თანახმად, სოხუმის ჰიდროელექტროსადგურის მფლობელი ე.წ. პარლამენტის წევრი რეზო ზანთარიაა.  ამავე ინფორმაციით, 2012 წელს, როგორც „ჩერნომორენერგოს“ ხელმძღვანელმა, ზანთარიამ „სოხუმის ჰიდროელექტროსადგური საკუთარ თავს გადასცა“.

ცნობისთვის, 2024 წლის ბოლოს, აფხაზური ტელეგრამის არხმა „აიაშარამ“ გაავრცელა ინფორმაცია „ვარდნილჰესი II “- ის „რეიდერული მიტაცების“ შესახებ.


მასში ვკითხულობთ, რომ ოკუპირებულ გალის რაიონში მდებარე უმოქმედო ელექტროსადგურზე ე.წ. პარლამენტის „დეპუტატმა“ რეზო ზანთარიამ დაიწყო სარეაბილიტაციო სამუშაოები და "სადგური მის კუთვნილებაშია". თუმცა, მათივე თქმით, დე ფაქტო მთავრობაში, არავის განუცხადებია მისი არც გასხვისების, არც იჯარით გაცემის თაობაზე.

მოგვიანებით, აფხაზეთის დე ფაქტო რესპუბლიკის შინაგან საქმეთა სამინისტრომ გალის რაიონში „ვარდნილჰესი II“ - ზე მიმდინარე სამუშაოების შეჩერების შესახებ გაფრთხილება გასცა.