რუსული მხარის მიერ ფსოუს საგუშაგოზე დაწესებული შეზღუდვების შესახებ გავრცელებულ ინფორმაციასთან დაკავშირებით, სოხუმი განცხადებას ავრცელებს. 

მედიაში გავრცელებული ცნობებით, შეზღუდვები ეხება „აფხაზეთის მოქალაქეებს“, რომლებსაც რუსეთის მოქალაქეობაც აქვთ; ამასთან, „საზღვრის“ დამრღვევებს - რუსეთის მოქალაქეებს, რომლებიც ე.წ. საზღვარს „აფხაზური პასპორტებით“ კვეთენ, ადმინისტრაციული პასუხისმგებლობა დაეკისრებათ.

აფხაზეთის დე ფაქტო რესპუბლიკის ე.წ. საგარეო საქმეთა სამინისტრო იუწყება, რომ მიმდინარეობს კონსულტაციები რუსეთის შესაბამის უწყებებთან. „ამ დროისთვის აფხაზეთ-რუსეთის სახელმწიფო საზღვრის გადაკვეთის რეჟიმში ცვლილებები არ არის“, - ნათქვამია ინფორმაციაში.

აფხაზური მხარის განცხადებით, „ფაქტობრივი საზღვრის“ გადაკვეთის პროცედურა რეგულირდება 2009 წლის 2 ოქტომბრის „სახელმწიფოთაშორისი შეთანხმებით მოქალაქეთა უვიზო მიმოსვლის შესახებ“. ამ დოკუმენტის მიხედვით, მოქალაქეებს შეუძლიათ გამოიყენონ ნებისმიერი მოქმედი დოკუმენტი, რომელიც ადასტურებს მათ ვინაობას და დაადასტურებს „აფხაზეთის ან რუსეთის მოქალაქეობას“.

„საგარეოს“ განცადებით, რუს კოლეგებთან კონსულტაციების შემდეგ, ისინი გაავრცელებენ დამატებით ინფორმაციას აღნიშნულ საკითხთან დაკავშირებით.

აფხაზეთის მოქალაქეებისთვის შეზღუდვების შესახებ ინფორმაცია ადრეც გაჩნდა.

2024 წლის თებერვალში კრასნოდარის ტერიტორიის რუსეთის უშიშროების ფედერალურმა სამსახურმა გამოაქვეყნა კომენტარი, რომლის თანახმადაც, 2024 წლის 1 მარტიდან „ორმაგი მოქალაქეობის“ მქონე პირები ფსოუზე „საზღვრის“ გადაკვეთას მხოლოდ რუსული და არა ე.წ. „აფხაზური“ პასპორტით შეძლებენ.

ოკუპირებული აფხაზეთის არჩეულმა ე.წ. პრეზიდენტმა ბადრა გუნბამ რუსეთის პრეზიდენტ ვლადიმერ პუტინთან შეხვედრაზე ორმაგი მოქალაქეობის საკითხების გადაწყვეტის საკითხი დააყენა.

პუტინი მას დაჰპირდა, რომ პროგრამა გაგრძელდება და შესაბამისი საკითხები „გადაიხედება“.

რუსული მედიის ცნობით, ოკუპირებულ აფხაზეთში მცხოვრები 243 ათასი ადამიანიდან 130 ათასზე მეტს რუსეთის მოქალაქეობა აქვს.