აფხაზეთი 1 აპრილიდან სრულად გადავიდა ენგურჰესიდან მიწოდებულ ელექტროენერგიაზე, ამის შესახებ „ჩერნომორენერგოს“ აღმასრულებელმა დირექტორმა თემურ ჯინჯოლიამ ადგილობრივ მედიას განუცხადა.
მისი თქმით, გრილი გაზაფხულის გათვალისწინებით, ელექტროენერგიის დღიური მოხმარება 6.5-დან 7.5 მილიონ კვტ/სთ-მდე მერყეობს დღეში.

ჯინჯოლიამ დასძინა, რომ ჯვარის წყალსაცავში წყლის დონე 6 მაისის მონაცემებით 461.8 მეტრია. დღიური წყლის მოხმარება 262 მ³/წმ-ს აღწევდა, ზამთარში კი 28-30 მ³/წმ-ს შეადგენდა.

შემოდგომა-ზამთრის პერიოდში რესპუბლიკაში ელექტროენერგიის დეფიციტია ენგურჰესის ჯვარის წყალსაცავში წყლის დაბალი მოხმარების გამო. დე ფაქტო რესპუბლიკაში მოსახლეობას დენი გრაფიკით მიეწოდება.  

აპრილის დასაწყისში ტელეგრამის არხები იუწყებოდნენ, რომ 2025 წელს სოხუმს ისევ გააგრძელებს რუსული ელექტროენერგიის საბაზრო ფასებში შესყიდვას, დეფიციტის აღმოსაფხვრელად. მედია წერდა, რომ რუსეთიდან მიწოდებული ელექტროენერგიის უფასო ნაკადი იწურება.

5 მარტს, რუსეთის პრეზიდენტ ვლადიმირ პუტინსა და ოკუპირებული აფხაზეთის ახალარჩეულ „პრეზიდენტ“ ბადრა გუნბას კრემლში შეხვედრის შემდეგ, რუსეთის ფედერაციამ ოკუპირებულ აფხაზეთს უფასო ელექტროენერგია 15 აპრილამდე მიაწოდა. ამის შესახებ დე ფაქტო რესპუბლიკის ენერგეტიკისა და ტრანსპორტის მინისტრმა ჯანსუხ ნანბამ განაცხადა აფხაზური ტელევიზიის ეთერში.

უკვე წლებია, სოხუმი ენერგოდეფიციტის აღმოფხვრას ვერ ახერხებს. ადგილობრივი ენერგოკომპანია ამის მიზეზად ელექტროქსელებზე გაზრდილ დატვირთვას და ინფრასტრუქტურის ცვეთას, სრული გამრიცხველიანების არარსებობას, ელექტროენერგიაზე დაბალ ტარიფებს, მოსახლეობის ნაწილის მიერ ელექტროენერგიის საფასურის გადაუხდელობას და კრიპტოვალუტის უკანონო მაინინგს ასახელებს.

ინფორმაციისთვის, ზამთრის თვეებში ენგურჰესი, ძირითადად, აფხაზური მხარის საჭიროებებს აკმაყოფილებდა. მხარეებს შორის არსებული შეთანხმება გამომუშავებული რესურსის 60/40-ზე პარიტეტით გადანაწილებას გულისხმობს.