სოხუმი და რუსეთის მიერ ოკუპირებული ლუგანსკი „დამეგობრდნენ“. შესაბამის შეთანხმებას ქალაქების ე.წ. ადმინისტრაციის ხელძღვანელებმა ბესლან ეშბამ და იანა პაშჩენკომ მოაწერეს ხელი.
დოკუმენტში აღნიშნულია, რომ „მხარეები დიდ მნიშვნელობას ანიჭებენ ორმხრივად მომგებიანი კონტაქტების გაფართოებას, გამოცდილების გაცვლას და ერთობლივი პროექტების განხორციელებას“, - წერს „აფსნიპრესი“.

აქვე ვკითხულობთ, რომ აფხაზური დელეგაცია „ლუგანსკის დაარსებიდან 229 წლისთავის აღსანიშნავ ღონისძიებებს დაესწრო“.



მიმდინარე წლის ივლისში სოხუმი და დონეცკი (მუნიციპალური წარმონაქმნი) გახდნენ დაძმობილებული ქალაქები, „ურთიერთობისა და თანამშრომლობის შესახებ“ მემორნადუმის ხელმოწერის ცერემონია, აფხაზეთის დე ფაქტო რესპუბლიკის „მინისტრთა კაბინეტის“ საკონფერენციო დარბაზში გაიმართა. მას აფხაზი ლიდერი ასლან ბჟანია ესწრებოდა.

უფრო ადრე, 2023 წლის თებერვალში აფხაზეთის დე ფაქტო რესპუბლიკის "სახელმწიფო უსაფრთხოების სამსახურმა" განაცხადა, რომ 
დონბასის სეპარატისტული ე.წ.დონეცკისა და ლუგანსკის რესპუბლიკების "მოქალაქეებს" ფსოუზე ე.წ. საზღვრის კვეთა ოკუპირებულ აფხაზეთში შესავლელად „უვიზოდ“ შეეძლებათ, ისევე , როგორც რუსეთის ფედერაციის მოქალაქეებს.

ცნობისთვის, 2022 წლის მარტში, ოკუპირებული აფხაზეთის "დამოუკიდებლობა" ე.წ. ლუგანსკის სახალხო რესპუბლიკამ აღიარა.

მანამდე აფხაზეთის დე ფაქტო რესპუბლიკის საგარეო საქმეთა სამინისტრომ გაავრცელა პრესრელიზი, რომელშიც ნათქვამია, რომ სოხუმმა და ე.წ დონეცკის სახალხო რესპუბლიკამ "დიპლომატიური ურთიერთობები დაამყარეს და ნოტები გაცვალეს".

26 თებერვალს, აფხაზმა ლიდერმა ასლან ბჟანიამ ხელი მოაწერა ბრძანებას დონბასის სეპარატისტული ე.წ.დონეცკისა და ლუგანსკის რესპუბლიკების „აღიარების“ შესახებ.

საქართველოს ორი რეგიონის აფხაზეთისა და "სამხრეთ ოსეთის " დამოუკიდებლობა სირიამ 2018 წელს, მანამდე, 2008 წლის აგვისტოს ომის შემდეგ, რუსეთმა, იმავე წლის სექტემბერში კი ნიკარაგუამ აღიარეს. 2009 წელს აფხაზეთის და ცხინვალის რეგიონი ე.წ. დამოუკიდებელ რესპუბლიკებად ვენესუელამ და ნაურუმ ცნეს.